Жу уттинингу бувсъссия жулва кказитрай Гъумук щинавун оькьлакьисса 5 шинавусса оьрчI ххассал увсса виричусса душваврая: Муслимова Аминая ва Садикьова Аидая. Ноябрьданул 1-нний вай душваврайн оьвкуну бур Москавливгу, Аьрасатнал ПрезидентначIасса Дагъусттаннал постпред Изумруд МухIуттиновал душвавран Постпредствалул цIаниятусса Барчаллагьрал чагъарду буллуну бур.
«Вай душваврал хар-хавар бакъасса гьунар бунни, нигьа къабувсун, ххассал унни чIивисса оьрчI. Барчаллагь зул виричушиврун, зу тарбия бувсса нитти-буттахъан, школалун. Щалва билаятран хавар хьунни зу бувсса гьунардания, зу хIакьсса виртталлу», — увкунни Изумруд МухIуттиновал. Ванил бувсунни Дагъусттаннал цIа-кьини бюхттул дурсса цаймигу вирттаврая: бюкьлакьисса душ ххассал буллай жан харж дурсса Марат Рахметовлуя, мукунма хьхьиривун бюкьлакьисса душ ххассал бувния мукьах мушакъатну ливчIсса Малик АхIмадовлуя, цIу ларчIсса къатлува хъамитайпа ххассал бувсса МахIаммад Аьбдулхаликьовлуя. КIицI ларгуна бивкIулия хIучI къакусса полицейский МахIаммад НурбахIандовлул цIагу.
Аминал ва Аидал барчаллагь увкуна цахра къулагъас дурсса Дагъусттаннал постпредствалухь. Бувсуна цивппагу къабюкьаншиврул цанничIун-ца лавчIун, хIалдания лаглагисса Адам ххассал увсса куц. Душру Москавлийн бувкIун бур цивппа дуклакисса Гъумучиял школалул директор Ххадижат ХIусниеващал. Ми гьуртту хьун тIий бур ноябрьданул 3-нний хьунтIисса «Созвездие мужества» тIисса МЧС-рал фестивальданий. ЛичIи-личIисса регионнаясса 21 оьрчIан микку «За мужество в спасении» тIисса медаль дулунтIиссар. Виртталсса душваврал Аминал ва Аидал бусантIиссар жулва буккултрахьгу Москавливсса аьрххилия, тиха бучIайхту.
