Ватан дуруччултрал кьинилун хасну Щардал школалий тIивтIунни Украиннал аьрщарай нанисса хасъсса аьралий операциялий чувшиврий жан дуллусса Жамалуттинов МахIаммад Жамалуттиннул арснал аьпалун хас бувсса Виричунал мурцIу.
Муний гьуртту хьунни райондалул администрациялул вакилтал, учительтал, дуклаки оьрчIру ва миннал нину-ппу, виричунал мачча-гъанми.
МахIаммад Жамалуттинов, хасъсса аьралий операция байбивхьусса цалчинсса гьантраяйва лавгун, артиллериялул дивизиондалул автомобил отделениялул дузалшиндарал взводрал командирну ивкIун ур. Чувшиврий жан дуллуну дур Запорожскаллал дяъвилий август зурул 20-нний. Аьрасатнал Президент Владимир Путиннул Указрайн бувну, лайкь увну ур Чувшиврул Ордендалун. Дуклаки оьрчIал сакин бувну бия Виричунан ва хIакьину хасъсса аьралий операциялий гьуртту хъанахъисса Аьбдул ЯтIуевлун, Аслан ХIалимовлун хас бувсса чIирал кказит. Дурккунни назмурду. Муния махъ Буттал КIанттул цIанийсса Хъунмасса дяъвилия зана къавхьуминнан дацIан дурсса гьакалдануцI дирхьунни тIутIив.
