Ххувшаврил байрандалул хьхьичI кьини Лакрал райондалийн ДР-лул БакIчи Рамазан АьбдуллатIиповлул цIания дяъвилул ветерантал барча бан бувкIун бия ДР-лул культуралул министр Зарема Буттаева.

Райондалул бакIчи Юсуп МахIаммадов, ДР-лул виваллил иширттал министр Аьбдурашид МахIаммадов ва Зарема Буттаева лавгуна ГьунчIукьатIрал шяравун дяъвилул ветеран Ибрагьимов Жамалуттин ва ларгсса шинал аьпалухьхьун лавгсса Даудов МахIаммад-ХIажинал щащар ПатIимат барча бан. Хъирив лавгуна Убрав Къардашов ХIусман барча ан. Зарема Буттаевал ветерантуран буллуна Республикалул БакIчинал цIаниясса арцущалсса конвертру ва цила чулухасса ссайгъатру. Ветерантуран цала чулухасса конвертру буллуна райондалул бакIчи Юсуп МахIаммадовлулгу.
Муния махъ бусравсса хъамал лавгуна дяъвилия зана къавхьусса Гъумучиял ва Гьу­хъаллал чиваркIуннал ва къуллугърал буржру биттур буллай ливтIусса полицанал зузалтран­сса гьайкаллачIа тIутIив дишин.
«Щалва Аьрасатнал ва Да­гъус­­­ттаннал халкьуннал цIа­них­сса байран, аьпа ва къюву циву ларсун нанисса Ххувшав­рил байран барча дуллай, вания тихунмай захIматрал ххувшавуртту дакъа ласлансса къабукканнав жулва халкьуннан тIий бура», — увкуна Зарема Буттаевал.