Февраль зурул 20-нний Новостройрай, администрациялул къатрал концертру дай залдануву, хьунни ЦIуссалакрал райондалул Культуралул управлениялул хъунмур ХIабибат Бу­ттаевал каялувшиндаралу хIадур дурсса Ватан дуруччайминнал кьинилун хас дурсса шадлугъ.

Ва мероприятие най дия «Пат­риотизм против терроризма» тIисса цIанилу. Культуралул управлениялул зузалтрал, райондалул агьалигу бавтIун, ччя-ччяни тIайла дуккай жагьилтал терроризмалия байщун баву, ялун нанисса ник Ватан ххирану тарбия даву мурадрай­сса мероприятияртту. Ва ххуллухсса шадлугърайн оьвкуну бия ЦIуминалийсса цинявппагу школардал учительтурайн ва дуклаки оьрчIайн, личIи-личIисса идарарттал каялувчитурайн. Мероприятиялий гьуртту хьунни ЦIуссалакрал райондалул хъунаманал хъиривчутал Алик Исрапилов ва Аьвдурашид Бу­ттаев, Жагьилтурал политикалул комитетрал председатель Заур МахIаммадов, КIулшивуртту дулаврил управлениялул хъунаманал хъиривчу АхIмад Нахаев, КIулшивуртту дулаврил управлениялул инспектор Светлана ХIасанова, методист Мисиду Шагьмандарова ва школарттал директортал.
Шадлугърал мажлис тIитIлай, цинявппагу Ватан дуруччайминнал кьинилущал барчагу бувну, ихтилат бунни Аьвдурашид Буттаевлул.
— ХIакьинусса кьини хъуннасса агьамшиву дусса масъала бур жула оьрчIру Ватан ххирану тарбия баврил масъала. Ялун нанисса ник Ватан ххирану тарбия дуллайри жущава терроризмалийн къарши бацIан хьунтIисса. Дин дан ччиманахун ахчилачисса цучIав акъар, так бяйкьусса ххуллийн къабу­ккан личIлулну бикIан аьркин­ссар. Дин ишла дуллай, цалва чапалсса мурадру щаллу буллалиминнал биялдарахьхьун къагьаншиврул, цIанакулсса чIумал нитти-буттангу, жяматрангу, оьрчIангу мюхчанну бикIан багьлай бур.
ОьрчIрув, зуятур хъар хъанахъисса жулва бучIантIимур, мунин жува цIакьсса гьану бизан аьркинссар. ЦIакьсса гьанугу бизан хьунтIисса Ватандалухсса ччаврийхчIинни. ХIакьину, школардайгу, ичIувагу, оьрчIру Ватан ххирану тарбия бан хIарачат буллан аьркинссару жува, — увкунни ванал.
Хъирив ихтилат бувсса Заур МахIаммадовлул бувсунни терактругу, миву оьзру хьумигу ялу-ялун чIяву хъанай бушиву ва гьарца пIякь учин бавуртту хьхьичI хьуминнуяр ягинсса хъанай душиву.
— ХIакьинусса кьини МВД-лул органнаву сияхIрай бивхьуну бур жула райондалиясса къадагъа дирхьусса дин дуллалисса 68 инсан. Миннава 4 инсан му сияхIрава уккан унни. ЦIанасса чIумал Сириянал билаятрай Аьрасатнан къакьамулсса ИГИЛ-дануву талай ур Дагъусттаннаясса 900 инсан. Вай укунсса иширттая, бяйкьу ххуллия жулва жагьилтал байщун баву мурадрай райондалий ччя-ччяни дуллалиссар АТК-лул заседанияртту, — увкунни Заур МахIаммадовлул.
ЦIанакул щалва билаятрай ва республикалий цIурувкьюсса терроризмалийн къарши ба­цIаврил масъаларттал хIакъиравусса ихтилат бунни Мисиду Шагьмандаровал. Ванил оьвчаву дунни цинявппагу жагьилтурайн, хьхьичIунсса спортсментурая, аьлимтурая, цумурцагу аралувусса хьхьичIунсса пишакартурая эбрат ласияра, хIарачат бувара школарттай куртIсса кIулшивурттугу ларсун, оьрмулуву лайкьсса кIану бугьан тIий.
Ва мероприятиялий Аьвдурашид Буттаевлул, барчагу бувну, шадлугърал даражалий дип­лом буллунни Ватан дуруччайминнал кьинилун хасну дурсса «А ну-ка, парни!» тIисса спорт­рал ва аьралуннал тIуркIурдал бяст-ччалливу цалчинсса кIану бувгьусса ТIюхчардал 1-мур школалун.
Ихтилатру къуртал хьуну махъ райондалул культуралул управлениялул зузалтрал кка­ккан дунни ххаллилсса концерт.
Ахирданий ва мероприятиялул сиптачитал хьусса ЦIу­ссалакрал райондалул Культуралул управлениялул зузалтрахь ва шикку гьуртту хьун бувкIсса цинявннахь барчаллагь увкунни мажлис бачин бувну бивкIсса Светлана ХIасановал.
Андриана Аьбдуллаева,
Имара Саидова