Февраль зурул 21-нний Гъумук Хъун дяъвилия зана къавхьуминнал гьайкалданучIа хьунни Ватан дуручлачиминнал кьинилун хас дурсса митинг.

Мунил сакиншинначитал хьунни райондалул администрациялул оьрчIащалсса ва жагьилтуращал­сса даврил ватуризмалул отдел, кIулшиву дулаврил ва магьирлугърал идарартту.

Митинграй гьуртту хьунни райондалул бакI дургьуми, администрациялул зузалт, идарарттал каялувчитал ва зузалт, учительтал ва дуклаки оьрчIру.
Митинг тIитIлай, Лакрал райондалул бакIчинал хъиривчу Юсуп Рамазановлул бавтIми барча бувуна Ватан дуручлачиминнал кьинилущал. Цалва ихтилатраву ванал бувсуна мархри тарихрал куртIнива нанисса бухьурчагу, ватан ххирашиврул лишанну хьусса байран билаятрай лахъа-хъунну кIицI лаглай байбивхьушиву 1918 шиная шихунмай.
КIицI лавгуна хIакьинугу жулва аьскартурал ирс лайкьну би­ттур буллай бушиву ватандалул хьхьичIсса цалва бурж.
— Жува даингу пахрулий бивкIссару жулва жува буруччин бюхъайсса билаятрал агьлу жувагу бушиврия. Тарихрал му тасттикь бувссар, мукун бикIантIиссар гихунмайгу.
Вай гьантрай жулва билаят­рай кIицI ларгунни цамургу аьпалул кьини – Авгъанисттаннава Совет аьрал буккан бувну 26 шин там шаву. Шинну циксса гьарчагу, жунма тачIав дакIния къабуккантIиссар та дяъвилул жулва билаятрал жагьилтурайн цуксса щавщи биян бувссарив. Бивссар му дяъвилул щавщи жулла республикалийнгу, райондалийнгу. Цикссагу инсантал буссар хIакьинусса кьинигу та дяъвилул щавурду духIлайнма, — увкуна Юсуп Рамазановлул.
Ялун нанисса никиран ванал чIа увкуна жулва ппухълуннал чумартшиврун лайкьсса наслу буккаву.
Лакрал ва Ккуллал районнал аьра­ли комиссар ХIасан Массуевлул бувсуна жулва билаятрай Аьралуннал байран сакин шаврил тарихрая. Ватан дуручлачиминнан хас дур­сса назмурду дурккуна Гъумучиял лицейрал школалул дуклаки оьрчIал. Митинг къуртал хьуна Дагъусттан Республикалул гимн учаврийну ва шамилла салют дулаврийну.
Гихуннай райондалул магьир­лугърал къатлул зузалтрал кка­ккан дуруна ватандалухасса балайрдал концерт.