Щалвагу билаятрай кунна, Каспийскалий шагьрулул хъунмур библиотекалувугу кIицI ларгунни Ватан дуруччайминнал кьини. ЧIявусса аьрали частьру, аьралитал бусса Каспийск шагьрулий гьарцагу шинал лахъа-хъунну хьунадакьайссар ва байран.

Бадрижамал Аьлиева
ЦIакь хьусса аьдатрайн бувну, ЦБС-лул, «Матери России» щалвагу Аьрасатнал жяматийсса су­ккушиндарал Дагъусттаннал региондалулмур отделениялул, «Единая Россия» партиялул кIанттул отделениялул, шагьрулул жяматий­сса сакиншиннардащал цачIу, дувайссия акция «Каспийчане – солдатам России» цIанилусса акция. Мунил лагрулуву, цащалва балайчитал, творчествалул коллективрдугу бувцуну, вай лагайссия шагьрулул зума-къирагърай бивхьусса аьрали бутIравун, бахшиширттащал, концертращал.
Гьашинумур шадлугъ дуван пик­ри бувну бия чан-кьансса дахханашивуртту дурну: бахшишру тIайла дурккун дия аьрали бутIравун, шадлугъ цурда дуллай бия шагьрулул хъунмур библиотекалуву.
Ватан дуруччайминнал кьи­нилун хас дурсса шадлугъ тIир­тIунни «Матери России» суккушиндарал Дагъусттаннаймур отделениялул председатель Таиса МахIаммадовал. Мунил барча бунни ва шагьрулий къуллугъ буллалисса цинявппагу аьралитал, чIа увкунни миннан цIакьсса цIуллу-сагъшиву, цалва буллалисса къуллугъраву тIайлабацIу, хьхьичIуннайшивуртту.
Гихунмай махъру лавхъунни Шагьрулул Мажлисрал председательнал хъиривчу Марина Теслял, МахIачкъалаллал епархиялул секретарь отец Иоаннул. Цалва ихтилатирттаву вайннал кIицI лавгунни хъуннасса агьамшиву дусса байран душиву Ватан дуруччайминнал кьини, чIа увкунни аьралийтуран цанма аьрали къуллугъ кIулшиву ишла дуллан анжагъ учениярттаву.
ДР-лул миллатрал политикалул министрнал чулуха, му министерствалул коллективрал чулуха бавтIми барча бунни ХIусман Абакаровлул. ДР-лул Миллатрал политикалул министерствалул зузалал цалва ихтилатраву кIицI лавгунни 23-мур февральданул ва 9-мур майрал кьинирду душиву цалла ватан ххираминнан яла агьамми байраннуну.
Махъру лавхъунни «Российский фонд мира» дунияллул халкьуннал жяматийсса фондрал региондалул отделениялул каялувчи Мухтар Даудовлул, шагьрулул военком Марат Пашаевлул, Солдатътурал ниттихъал комитетрал председатель Зульфия Расуловал, ФСКН-лул Управлениялул отделданул начальник, полициялул полковник Хасайбат Валиевал ва чIявусса цайминнал.
Мажлис чIюлу бунни Зарина Тилидзел, Рашид Багатаевлул, Музыкалул ва хореографиялул кIулшиву дулайсса гимназиялул тарбиячитурал, 6-мур школалул ва КМШИ-лул дуклаки оьрчIал.
Ахирданий ва батIавривух гьуртту хьуми лавгунни Славалул обелискрачIа тIутIив дишин.