ЧIярусса шиннардий Ккуллал райотделданул хъунаману зий ивкIсса Ванатиев Кьурбан Нураттиновичлун май зурул 5-нний хьунтIиссия 90 шин. Цалва къуллугърал бурж яхI-намус буну, адав-инсап дуну, дакI марцIну биттур баврихлуну райондалул агьалинал хIакьинусса кьинигу ванал цIа хIурмат-кьиматрай дакIнийн рутлайнма бикIай.

И. Саидова
— Жаваблувсса къуллугърай зий Кьурбан Нураттиновичлул хъуннасса тIалавшинна дикIайва хьхьичIра-хьхьичI цаятура ва цукунчIав къуллугъ ишла къабайва цанма ва цалва гъан-маччаминнан, — тIий, ччя-ччяни дакIнийн бутлайнма бикIай райондалул агьали.
Инсан мяйжаннугу дакIний личIай оьрмулуву цалла дурсса хъин-хъинсса давурттайну. Укун хъама къаитайсса уздансса, ххаллилсса адамина ия Хъусращиял шяравасса Нураттиннул арс Кьурбан Ванатиев.
Кьурбан Нураттинович увну ур 1926 шинал захIматрал кьадру-кьимат бусса Нураттиннул ва ПатIиматлул кулпатраву. Хъусращиял шяраву арулва классгу къуртал бувну, дуклан лавгун ур таний хъинну сийлуву бивкIсса ЧIяйннал дянивмур даражалул школалийн. 1932 шинал ноябрь зуруя байбивхьуну, 1943 шинал январь зуруйн ияннин ва лахьлай ивкIун ур Гъумуксса животноводствалул ва техникалул курсру. Вай курсругу був­ккуну, цаппара хIаллай зий ивкIун ур Хъусращиял колхозраву зоотехникну. Муния махъ ванал сайки ца шин дурну дур Вихьуллал школалий военрукну зий.
1944 -1948-ку шиннардий Кьурбан Нураттинович ивкIун ур Ккуллал райондалул милицанал отделданул секретарьшиву дуллай. Ва даврий зий ванал най бунува ккаккан бувну бур цалва бюхъу ва гьунар. Тания шихунай цинявннан эбратну ва дакI марцIну захIмат буллай органнаву зий дурну дур Кьурбан Нураттиновичлул сайки 40-хъул шинну. Райотделданул милицанал секретарьнал къуллугърая айивхьуну, лавхъун ур ва райотделданул начальникнал къуллугърайн.
Даврил опыт бусса, итххявхсса пишакар хIисаврай, 1958 шинал Кьурбан Нураттинович тIалав увну ивкIссар ЦIуссалакрал райотделданий каялувшиву дан. Цаппара шиннардий гиккугу зий ивкIун, цIуницIа зана хьуну ур цува зий ивкIсса Ккуллал райотделданийн. 1967 шинал къуртал бувну бур Ростоврайсса МВД-лул милицанал лаваймур школа.
Цува ва къуллугърай зузи­ссаксса хIаллайгу цуппа ца иш хьуну бакъар ванал цайнна аьй дучIан дувансса. Цуксса захIматсса тахсиркаршиву, тIулдакъашиву дурну духьурчангу Кьурбан Нураттинович хIала увххун махъ му чара бакъа бакIуйн дуккан дайссия. Тай шиннардий хьусса тахсиркаршивуртту ванал аьч дурну, тIайласса танмихIру бувну, инсантал рахIат буккан бувайссия. Ва ия игьалаган къакIулсса, уххаву дакъа зун икIайсса, цил багьайкунсса, органнаву зун лайкьсса пишакарнал хасиятру дусса инсан. Кьурбан Нураттиновичлул яла ххуймур хасиятгу дия пахру-ххара бакъашиву, жяматравух мудан хIалану ушиву, аьркинний, маслихIат ккавккун, танмихIрайн къабувцунма инсантурал масъалартту лащу-щаллу бан кIулшиву.
Ванал каялувшиннаралу зий бивкIсса зузалтран, оьрмулул ххуллийн тIайла бацIан бувсса жагьил­сса никиран тачIавгу хъамакъаитай цахава аякьалий ивкIсса Кьурбан Нураттинович.
ДакI марцIну бувсса къуллугърахлу ва давриву хьхьичIунсса ккаккияртту чIалачIи даврихлу ва мукуна жяматийсса давурттавух чялишну гьуртту хъанай ивкIун тIий лайкь хьуну ур ва цикссагу ларайсса наградарттан. Миннувух дур «Отличник милиции» тIисса хIурматрал лишан, «За безупречную службу в органах МВД I, II, III степени» тIисса медаллу ва цаймигу хIукуматрал чулуха­сса ларайсса наградартту. Къуллугърая лавгун ур Кьурбан майорнал чиндалуву.
Пенсиялийн увккун махъгу, райондалий ца яла бусравма ва къуллугърал бурж дакIнийхтуну биттур байсса пишакар хIисаврай Райпорал сакиншиннарал отделданийгу каялувшиву дуллан увцуну ур. Органнаву зий аьдат хьусса Кьурбан Нураттиновичлул райпорал давугу низамрайн дуртссар. Ва ия ичIувагу, даврийгу кьянкьасса низам дуру­ччин ххирасса, тIайламунил ххуллу бувгьусса инсан.
Кьурбан Нураттиновичлул ва ванал кулпат Шагьуннул хъуни бувну бур ва эбратрансса тарбия дуллуну дур 5 оьрчIан ва 11 оьрчIал оьрчIан. Буттал ххуллу язи бувгьуну бур хъунама арс Рамазаннул ва ванал арс Нураттиннул.
Кьурбан Нураттиновичлул кьабивтсса щалва наслу бур цахава лавхьхьусса, кьянкьасса тIалавшиннардай тарбия бувсса, дуккавриву, давриву хьхьичIун ливчусса, буттал цIа лайкьну дуручлачисса.