Ккуллал райондалий май зурул 25-нний рирщунни дуккаврил шиналсса махъва-махъсса гюнгутIул занг.Ва занглищал гьартамур ххуллийн бувкссар гьашину 11 класс къуртал буллалисса оьрчIру. Вай оьрчIах ябивтсса чIумал, вайннал исвагьишиву янилун дагьлай, жувагу жагьил хъанан бикIару. ДакIру кIукIлу лаг­лай, жулами дуклаки шиннугу хьхьичI дацIлан дия.

Ккуллал райондалий бур 14 школа. Школа бакъасса дур анжагъ ца Ссухъиящиял шяравалу.
Махъра-махъсса занглицIун оьрчIру барча бувунни райондалул администрациялул чулухасса вакилтурал.

ОьрчIан дуллунни шинал мутталий ккаккан дурсса ккаккиярттахлу грамотарттугу. ОьрчIру барча буван бувкIун бия мукунма культуралул зузалт, шяраваллал администрациярттал каялувчитал ва нитти-буттахъул.

[pullquote]Гьашину школар­ттай дуклай бия 757 оьрч1. Вайннавату 11-мур класс къуртал буллай ур 33 оьрчI, урчIулчинмур класс къуртал буллай ур 86 оьрчI. [/pullquote]

Ва кьини цурдагу хьунни дарусса, баргъ бивтсса. ТIабиаьтгу оьрчIру барча буллалисса кунна дия. Ххуллухъин баннав, оьрчIрув, зун!