Лакрал райондалул бакIчи Юсуп МахIаммадов ялтту увккунни Гъумучиял Хъун бярнил лагма-ялттусса давурттал. Ихтилат бунни шикку зузисса прорабнащал ва усттартуращал. Вайннал бусласимунийн бувну, хIакьинусса кьининийн бярнил лагма-ялтту дуркьун дур 10 куб. ччюрклил, ххуку бувну бур бухсса мурхьру, сагъсса мурхьругу цIубуккан бувну бур.
Юсуп МахIаммадовлул тапшур бунни хьхьувайсса чани лахъайсса чIюлу дурсса ттарцIру дишинсса масъала ххал бигьин. Къулагъас дунни усттартурал давривусса диялдакъашивурттахгу. Аьмну усттартурал даврия райондалул бакIчи рязину ливчIунни.
«Жулва мурад ва бярниха аякьа давур, марцIну буруччавур. Цанчирча ва бур хъинну эмаратсса кIану. Лагма ххялчIив даркьуну махъ шикку бишинтIиссар скамейкарду. Щаллу дантIиссар бигьалагансса къулайшиннарду», — увкунни райондалул бакIчинал.
Зулайхат Тахакьаева
