ДР – лул Жагьилтурал политикалул комитетрал хъунаманал хъиривчу Муслимат Халимбагова, Лакрал райондалул жагьилтуращалсса даврил ва туризмалул отделданул хъунама МахIаммад Гадаев ва Закарижаева Дианал даврил каялувчи ПатIимат Парамазова
Укунсса цIа дирзун дия Гъумучиял школалул 6-мур классрал дуклаки душ Закаржаева Дианал «Россия туристическая глазами детей» тIисса щалвагу Аьрасатнал конкурсрал республикалул этапрайн тIайла бувксса, Лакку улклул авадансса тарихрая ва тарихрал гьайкаллая бусласисса докладраву. Цувгу хIадур бувну бия ОьрчIал творчествалул къатлул методист, «Юный турист» кружок дихьлахьисса ПатIимат Парамазовал каялувшиннаралу.
Докладраву Закаржаева Дианал бувсун бия Гъази-Гъумучиял ханлугърая, Надир-шагьнал аьрал ххит бувсса кьюкьлул бакIрай ивкIсса Хан-Муртазааьлил гьайкалдания, «Лакрал Жанна д Арк» ПартIу ПатIимал гьайкалдания, паччахI ххуллуя, ВацIилу зунттуя, Яманитурал хIатталлия, ХIажи-АхIмадил, Щайх Жамалуттиннул, Кьаландардул зияратирттая, Ханнал бярния, Ханнал вацIлуя, Ханнал хIатталлуя, дунияллий яла хьхьичIавасса мукьва мизитравун багьлагьисса Гъумучиял Хъун мизитрая, БурхIай Къалалуя, ЦIукьуллалуя. Докладращал дирхьуну дия цилла дурсса вай кIицI лавгсса гьарцагу кIанттурдал суратругу.
Интернетраву ва докладрахлу буллуну бур яла чIявусса чIурду, конкурсрал жюрилулгу бивхьуну бур лавайсса кьиматру.
Республикалул сайки цинярда районнаясса ва шагьрурдаясса дуклаки оьрчIру гьуртту хьусса конкурсрай «Россия гостепреимная. Приезжайте к нам» тIисса номинациялуву Дианал бувгьуну бур цалчинмур кIану. ДакIнийхтуну барчагу буллай, Дианан чIа тIий буру гихунмайгу тIайлабацIу.
