Ва алхIат кьини, цIусса ду­ккаврил шиндайдихьулул бухкIуллий, Гъумук хъунна­сса шадлугърай тIивтIунни школалийн гьаннинсса оьрмулул оьрчIансса дуккаврил идара. Му цуппагу бур бургъил лащин дусса, «Солнышко» цIа дусса.

Зулайхат Тахакьаева
Идара бувну бур Гъумучиял школалул байбихьулул къатрал гьанулий.
Идаралул къатри дуллай байбивхьуссар ларгсса шинал ссуттил, райондалул иширттаву мудана чялишсса гьурттучи, республикалий ца яла хьхьичIунсса ишбажаранчи Аьлиев ХIасаннул каялувшиндаралусса «ССП» ООО-лул строительтурал. Цаппарасса зурдардил дянив дурну дацIан дунни дя Гъумук, цIаниха лархьхьуну ттюнгъасса, урувгманал яругу ххари, дакIругу гъили дуллалисса, ттизаманнул тIалавшиннардацIун даркьу­сса, гьарца шартIирдал лащу-щаллусса, багьлул ххирасса ва даража ххуйсса оборудованиялул дузалсса эмаратсса къатри.
Идара зий байбивхьуссар июль зуруйва. Мивун занай бур 30-ннийн бивсса оьрчIру, ца Гъумуча бакъасса, лагма щархъавассагу.
Райондалул оьрмулуву хъуннасса агьамшиву дусса шадлугърай гьуртту хьун бувкIун бия бусравсса хъамал: ДР-лул ХIукуматрал хъунаманал хъиривчу, экономикалул министр Раюдин Юсупов; ДР-лул культуралул министр Зарема Бу­ттаева; ДР-лул ХIукуматрал хъунаманал маслихIатчи, Халкьуннал Мажлисрал депутатшиврийнсса кандидат Жяъпар Абуев; Жяматийсса палаталул хъунаманал хъиривчу Ссапар Аьбдуллаев; ишбажаранчи Сайпуллагь Аьбдуразакьов; ДР-лул кIулшиву дулаврил министрнал маслихIатчи Жамалуттин Жамалов; вара министерствалул пишакар Кинаят Юнусова; «АС» фирмалул хъунама Сефер Аьлиев ва цаймигу.
Шадлугъ тIитIлай, райондалул бакIчи Юсуп МахIам­мадовлул, хъамаллурахьхьун аьла-ссаламгу буллуну, барчаллагь увкунни Раюдин Юсуповлухь ххаллилсса, ттизаманнул кьяйдалийсса къатри дан бувсса кабакьулухлу. Барча­ллагьрай кIицI лавгунни Респуб­ликалул БакIчи Рамазан АьбдуллатIиповлул райондалул чулухуннайсса къулагъас.
Райондалул администрациялул чулухасса барчаллагьрал чагъарду буллунни къатри дуллай бивкIсса строительтуран. КIицI лавгунни лакрал миллатрал хIакьсса патриот ХIасан Аьлиевлул каялувшиндаралусса строительная компаниялул райондалий ттинингу тамансса объектру бувшиву, цала харжлугърацIух буллай ушиву банкетный зал ва гостиница. Барчаллагь увкунни райондалул муданмасса чIарахбацIулт Ссапар Аьбдуллаевлухь, Сайпуллагь Аьбдуразакьовлухь, Султан ЦIаххаевлухь, вайннал кьюкьлувун цIуну хIала увхсса Жяъпар Абуевлухь. Ттигъанну ванал 1, 5 млн. къ. школалун, 500 азарда къ. Гъумучиял детсадран ва 500 азарда къ. больницалун кумагран дуллуну, ми идарарттай най дуссар ремонтру.
Бувсунни детсадру цайми щархъавугу буллансса каширдах луглан тIий бушиву, цанчирча жагьилтал шяраваллава лихълахъаврил ца хъунмур багьана хъанай буну тIий, давуртту дакъашивруцIун, оьрчIан ттизаманнул оьрмулун лархьхьусса кIулшиву ва тарбия дулунсса шартIру дакъашиву.
Больницалул ва школалул къатри дуллай лахъи лаглай, цува жяматрал хьхьичI ламусравун агьлай ушиврийгу чIурчIав дурну, Юсуп МахIаммадовлул тавакъю бунни Раюдин Юсуповлухь кIивагу объект бувну къуртал бан кабакьу бува куну.
Раюдин Юсуповлухьхьун махъ булун хьхьичI райондалул бакIчинал ванай бавхIунни «Лакрал райондалул бусравсса гражданин» цIа дуллалишиву тасттикь булласса лента. Дуллунни муницIунсса лишангу.
Цала ихтилатраву Раюдин Юсуповлул кIицI лавгунни ДОУ-лул къатри ччясса мутталий къуртал дуршиву. ДакIнийн бувтунни ми дуллай байбивхьу­сса чIумал цува, кIихIуллану, Юсуп МахIаммадовлухь цIухлай ивкIшиву, бюхъавивав объект цIусса дуккаврил шин дайдишиннин тапшур бан, тIий. Бувсунни къатри дуллалиссаксса хIаллай цува цимилагу увкIшиву ялтту уккан. ЧIюлусса, оьрчIан лайкьсса къатрайн ящайхтурив цува хъинну ххари хьушиву.
КIицI лавгунни вай гьантрай Дагъусттаннал районнай ва шагьрурдай тапшур бан тIий бушиву 7 детсад ва 9 школа, кризисрал шартIирдаву ва Республикалул БакIчиналгу, ХIукуматрал хъунаманалгу, муниципал сакиншиннардал бакIчитуралгу дурсса хъинну хъуннасса даву душиврий чIурчIав дуллай.
«ХIакьину жува детсад бакъару тIитIлатIисса, дуккаврил идарару. Цанчирча шикку оьрчIру школалийн хIадур буллан най буну тIий, кIулшиву дулаврил цамур чIалъаьлувун бучIаннин миннан буккин ва чичин кIулну бикIаншиврул. Ттула ихтилат къуртал баннин кIицI къалавгун ацIан къахьунссар, цуксса ххарисса дакIнищал ачайссарав нава зучIан – ххуйсса ххуллурду, ххуй-ххуйсса объектру буллай чIалай. Зун хъунмасса талихI хьу­ссар Юсуп МахIаммадов куна­сса бакIчи бакIрайн агьаврийну. Цанчирча ттун кIулли ва инсан циксса къуллугъчитурал хьхьичI ацIлай уссарив райондалул оьр­му ххуй бансса чараннах луглай, кумаг тIалав буллай», – увкунни экономикалул министрнал.
Детсадран пишкаш бунни морозильник.
«Раюдин Юсуповлул кIицI лавгунни ва идара бушиву дуккаврил идара. На ххи бавияв магьирлугърал ва дуккаврил идара, куну. Цанчирча идаралул чIалачIин дур хъинну исвагьисса. Так багьлай бур чIумущал шаттирду лавсун бачин, хIакьинусса кьинилул тIалавшиннардай зун бюхъайсса ва мунищала архIал оьрчIру ххирасса, миннаву личность тарбия ан бю­хъайсса, миннал рувхIанийшиву авадан дан бюхъайсса даражалул пишакартал кIункIу бан», – увкунни Зарема Буттаевал.
Цила чулуха пишкаш бунни музыкальный центр, мунищал дагъусттаннал, оьруснал ва дунияллул классикалул произведениярттал дискругу.
Жяъпар Абуевлул пишкаш бунни компьютер.
Детсадравун занай щаллу ба­къасса кIива барз хьуну бухьурчагу, хъинну хIадур бувну бия мюрщулт байрандалийн. Шеърирдал журалий барчаллагь тIий бия вай райондалул каялувчитурахьгу, строительтурахьгу.
Райондалул бакIчинал ДОУ-лул каялувчи Зулайхат Макьсудовайн цIусса идаралул кIула тапшур дурну махъ, му тIитIлатIишиврул лишанну хьусса лента кьувкьуна Раюдин Юсуповлул, Зарема Буттаевал, Жяъпар Абуевлул ва Юсуп МахIаммадовлул. Муния махъ хъамал бувххуна идаралул вив. Ххал дуруна мивусса шартIру.