![](https://ilchi.info/wp-content/uploads/2020/07/frt5yy6y.jpg)
Ккуллал райондалий дур ацIния мукьра шяравалу. Вай шяраваллурду почталийх дучIаймунил щаллу дуллай зий бур мукьва почта.
Ваччавсса почталул щаллу байссар: Ваччиял, СумбатIуллал,1-мур ва 2-мур ЦIувкIуллал, ЦIущардал, ЧIяйннал, Хъюйннал шяраваллал жяматру. Вихьливсса почталул: Вихьуллал, Ссухъиящиял, ЦIуйшиял, Хъювхъиял ва Къяннал жяматру.
Уттигъанну на хьунаавкьура Вихьуллал почталул хъунаманащал – МахIмудиев Мяммащаллащал. Почталул зузалтрал кьинигу барча дурну, тавакъю бувссия, цалла даврия ва шикку зузисса зузалтрая чан-кьансса буси куну:
— На Вихьуллал шяравусса почталул хъунаману зий ура 2001-ку шиная шинай. Ттул дур техникум бувккусса дянивсса кIулшиву. Жу щаллу дайссар ххюра шяраваллил аьркинлугъру. Жул хъунмур давуну хъанай дур: чагъар гьан баву, ласаву, арцул перевод даву, посылка гьан даву, кказит-журналлу биян баву ва цаймигу почталул кумаграйхчIинсса ишру щаллу баву.
Мукунма жул почталийх ласайссар личIи-личIисса арцуйнусса пособиярттугу. Ший, шяраваллаву, яхъанахъисса инсантурал, кказит-журналлу буккин бюхъайнал, чикъавчуну къабитай. Жул почталул хъунмур кIануну хъанахъиссар Лаващавсса почтамт. Гихар жун харжи булайссагу, даврин кьамул баврил, букьан баврил, отпускалийн гьан баврил ишругу щаллу байссагу.
Вихьуллал почталийн дагьайсса давуртту дуллай бур цала даву хъинну ххуйну кIулсса, чIярусса шиннардий почтальонталну зузисса инсантал. КIицI дан ччива миннал цIарду: МахIаммадова Гугьарша, МахIмудиева Щипа (Вихьул), МахIаммадова Разинат (Ссухъиящи), Дайтиева Зарема (ЦIуйши), ХIажикьурбанова Рукьижат (Къян), Алхасов Аьбдуссалан (Хъювхъи).
ХIайп учинсса иш ци бия учирча, шяраву хьусса бивкIурдайн бувну, пайда хъанай бакъая Вихьуллал почталул зузалтрал сурат рищун.
Амма ттун бахтти хьуна, Лаващиял почтамтрая Вихьлив почта лавсун увкIсса Разакьов МахIаммадлул сурат рищун. Почталул даврий шофер-инкассаторну ва зий ур 2013-ку шиная шийнай. Ва цувагу лайкь хьуну ур Почталул чулухасса ХIурматрал грамоталун.
Жувагу барча банну вай жулла даврил уртакьталну хъанахъисса, жунма чара бакъа аьркинсса почталул зузалт. ЦIуллу баннав зу!