ЦIуссалакрал райондалий хьунни ПаччахIлугърал Думалувун ва Дагъусттаннал Халкьуннал Мажлисравун кандидатурартту дирхьусса Аьбдулмажид МахIрамовлущалсса, Артур Исрапиловлущалсса ва Бувайсар Сайтиевлущалсса хьунабакьаву. Шикку гьаз бунни райондалул агьалинал оьрму хьхьичIунмай буваврил хIакъиравусса масъалартту.
ПаччахIлугърал Думалувун цIа рирщусса Аьбдулмажид МахIрамовлул гьарза-гьартану бувсунни, цува увчIирча, цуку-цукунсса давурттив дуллан дакIнийну уссарив.
ЦIуссалакрал агьалинал буруккинтту ва масъалартту ххуйну кIулсса Артур Исрапиловлул бувсунни Дагъусттаннал Халкьуннал Мажлисрал депутат хьурча, цукунми масъаларттах къулагъас дуллан дакIнийну уссарив. Райондалул хъунама МахIаммад-ХIажи Айдиевлул цалвамур ихтилатраву кIицI лавгунни «Единая Россия» Аьрасатнал президентнал партия душиву, гьаманки, му партиялул кабакьаврийну бартдиргьушиву уттинингу хъунисса, агьамсса проектру, уттиния тинмайгу агьалинал му партиялийн вихшала душиву ккаккан буванссар тIисса умуд бушиву.
