Уттигъанну, лавайсса даражалул пишакартал хIадур буллалаврихлу ва чIярусса шиннардий бувсса захIматрахлу, 2016 шинал январьданул 16-нний бувксса ДР-лул БакIчинал ХIукмулийну, «За заслуги перед Республикой Дагестан» тIисса бюхттулсса наградалун лайкь хьунни, ЦIуссалакрал райондалийсса Чапаевкаллал шяравасса, Къизлардал педагогикалул пишакартал хIадур байсса колледжрал директор Аьбдуллаев Аьли Аьбдуллаевич.

Залму АьбдурахIманова
Ва хъуннасса награда Аьли Аьбдуллаевлун Респуб­ликалул БакIчи Рамазан Аьб­дуллатIиповлул дуллунни уттигъанну Буйнакскалий хасъсса кIулшивуртту дулайсса дянивми даражалул заведенияр­ттал каялувчитал бавтIсса шадлугърай.
Шиккува кIицI лаган, Къиз­­лардайсса Дагъусттан­нал профессионально-педа­го­ги­калул колледжрал каялувчишиву дуллай Аьли Аьбдуллаев 2002 шиная шихунай ур. Ва ур «ДР-лул лайкь хьусса учитель», «Отличник народного образования», «Почетный работник среднего профессионального образования РФ» ва «Отличник среднего специального образования СССР».
Мукуна Аьли Аьбдуллаевич хъанахъиссар Дагъусттаннал ссузирдал Директортурал совет­рал председательгу. Ва ур цалла даву хъинну ххирасса, коллективралгу, студентътуралгу, Къизлардал жяматрал дянивугу бусравсса ва хIурматрайсса каялувчи. Аьли Аьбдуллаевлуйн Къизлардал педагогикалул колледж тапшур бувну махъ колледж­рал сий лахъ хьуну дур. «Золотая медаль «Европейское качество» тIисса конкурсрал лауреат хьуну бур. ХIакьинугу Къизлардал педколледж къуртал бувсса ва дуклакисса студентътал бур яла лахъми даражалул педагогтуран ккаллийсса, республикалул личIи-личIисса конкурсирттай хьхьичIунсса кIанттурдан лайкь шайсса пишакартал.
Ва бур 14 шинал дяниву Аьли Аьбдуллаевлул був­сса захIматран лайкьсса кьимат. Ва наградалущалгу барча уллай, щалвагу миллатрал чулуха чIа учин ччай бур Аьли Аьбдуллаевлун давриву тIайлабацIу ва вания гихунайгу лахъсса наградарттан лайкь хъанансса каши-кьудрат ва цIуллушиву.