Барча буллай ура зунттаву, Дагъусттаннал ва Аьрасатнал шагьрурдай ялапар хъанахъисса щалвагу лакрал миллат жулва «Илчи» кказитрал юбилейращал.

25 шинал мутталий «Илчи» кказитрал, му кказитрай зий бивкIминнал ва цIана зузиминнал лакрал, миллатран хъунмасса хайр-мюнпат бусса давуртту дурссар. Вай шиннардил лажиндарай «Илчилул» чIалачIи бунни жучIава, лакрал дянив, чIявусса гьунарду ххисса инсантал бушиву. Нюжмардия нюжмардийн буслай бия буккултрахь, шаннагу жулла райондалий ба­къассагу, Дагъусттаннайгу, Аьрасатнавугу, хIатта дунияллийгу хъанахъимуния.
«Илчи» кказит – му жула миллатрал вирдакIри. Кказитрал жунма мудангу дакIнийн бутлай бия, гьарицагу лаккучунан цала ни­ттил маз чара бакъа кIулну бикIан аьркиншиву. Кказитрал ккаккан бунни лакку мазрал пасихIшиву, нахIушиву, ххаллилшиву. Агарда къачча-ччай жува лакку мазрая арх буцарча, жува арх буцлациссару жулва зунттая, зунттал аьдатир­ттая. Зунттал аьдатирттая арх увц­сса инсаннаяр мискинсса цучIав акъассар.
Ккурккуллал шяраваллил, ВицIхъиял махIлалул щархъал жяматрал цIания дакIнийхтуну барчагу буллай, барчаллагь тIий ура циняв­ппагу «Илчи» кказитрал зузалтрахь вай 25 шинал лажиндарай жулва мазгу, багьу-бизугу, аьдатругу дуруччаву мурадрай бивхьусса хъунмасса захIматрахлу. ЦIуллу баннав. ТачIав чан къабаннав жунма миллатрал вирдакI, лакрал бюх­ттулшиву ва ххуйшиву гьаз дуллалисса «Илчи» кказит. ЧIяву баннав кказитращал дусшиву дан бю­хъайсса, лакку мазрах ччаву дусса инсантал.
Даниял Магьдиев,
Ккурккуллал школалул
директор