Халилбекова (Чавтараева) Гугьар АхIмадлул душ бувну бур апрель зуруй 1936-ку шинал Кумиял шяраву. ЧIивинияцIа зирангсса, итххявхсса душ, марцIсса ххювардай 7 классгу къуртал бувну, бувххун бур Щурагьсса хъаннил педучилищалувун.

Мивугу отличнайну ккалай, комсомолданул давугу дачин дурну, спортрахунгу багьну бивкIун бур. Ванил кIийла-шамийла республикалул спартакиадарттай хьхьичIунсса кIанттурду бувгьуну, кубокругу лавсун бур. Ххювардай педучилище къуртал бувсса жагьилсса учительница зун тIайла бувккун бур БахIикIуллал байбихьулул школалийн, оьрус мазрал дарсру дихьлан. Амма гьунар бусса душ ца шинавун бувчIуну бур Лакрал райком комсомолданул 2-мур секретарьну. Хъиривмур шинал Гугьар АхIмадовна бивтун бур Дагъусттаннал обком комсомолданул Особый отделданул заведующийну. Ряхра шинай миккугу зий, заочнайну университетрал филологиялул факультетгу къуртал бувну бур. Гугьардул цила лас Халилбеков Аьбдуразакьлущал хъуни буллай бия шанма-шанма оьрчI, жаваб дулайсса жапасса давугу биттур дуллай. Яла оьрчIру мюрщину, миннаха аякьа аьркинну, тиху-шихунмай занан захIмат хъанай тIий, 1965-ку шинал комсомолданул даврия Аграрно-экономический техникумраву литературалул дарсру дихьлан лавгун, хIакьинусса кьинигу микку зий бур. Гугьар студентътурангу ххирасса, коллегахъангу бусравсса, за кIулсса, гьунар бусса преподаватель бур. Гьашину Гугьар АхIмадовна хIукуматрал личIи-личIисса идарарттай зий дурусну 60 шин хъанай дур.
Му бур пахру-ххара бакъасса, цила дарс дишаврил даража лахъ баврил, студентътуран кIулшиву дулаврил ялув мудан бавцIусса хIакьсса зузала. Шяраваллава бувкIсса оьрчIавун луттирдах, литературалух гъира бутан личIи-личIисса шартIру ляхълай, гайннахь бусаймур гъира багьанну, бюхханну, дакIний личIансса ку­ццуй буслай, личIи-личIисса пособияртту ишла буллай, семинарду, экскурсияртту буллай, театрданувун буцлай, культуралуву хъана­хъимунищал, литературалул ишир­ттащал оьрчIру кIул буллай, миннал кIулшиву гьаз дан хъунмасса захIмат бишай Гугьар АхIмадовнал. Комсомолданул даврий зузиний дуллусса личIи-личIисса дипломру ва грамотартту дакъассагу, утти­гъанну Гугьар АхIмадовнан Мос­кавлия КIулшивуртту дулаврил министерствалул чулуха дуркIунни ХIурматрал грамота. «За многолетнюю плодотворную работу по развитию и совершенствованию учебного процесса, значительный вклад в дело подготовки высоквалифицированных специалистов», — куну чивчуну бур ва лахъсса даражалул документрай. Давриву бакъассагу, Гугьар АхIмадовна кулпатравугу, гъан-маччанавугу бусравсса, ххирасса, хIурмат бусса нинугу, ссугу, душгу, гъанчугу бур. Ванил кIиягу арсгу, ца душгу, мукьва оьрчIал оьрчIгу ванил лавай бавцIуну, бан­сса хIурматрах луглайнма бикIай. Цуппа Гугьар АхIмадовна бур хIакьсса зунттал душ, цихава цайминналнияр, цила цайминнаха къулагъас дуллай, цаманан банмуних луглай оьрму нанисса. Гугьардул арснал щар Саидал ласнал ниттил юбилейрай дакIнийхтуну увкунни: «Ва ттул кIилчинмур нинур. Ни­ттил куннасса гъилишивугу, аякьа ва янусса ихтилатгу бакъа жун вания къаккавкссар. Жун ва уттигу 15 шинай укунма, хIакьину кунма, зирангну битанссар тIисса умуд бур».
Битаннав ина, Гугьар АхIма­довнай, чIярусса шиннардий цIуллуну, оьрчIал, кулпатрал, уссур­ссуннал ххари буллай. Гьарца чулуха бюхълай битаннав!
Вил дустал, коллегахъул, гъан-маччами, ина ххирами