Март зурул 9-нний бартлаглай дур 60 шин ххаллилсса лаккучу, ТIюхчардал шяраватусса виричу Бурчакьов Насир Бурчакьлул арснан.
Ва ур хъунанал хIурматгу, чIивинал хатиргу кIулсса инсан. Цала маччачунайн, дуснайн, кIулманайн кьини дурксса чIумал, Насир гьарца чулий чIарав ацIайссар.
Жула Дагъусттаннайн къачагътал ххявхсса чIумал, Насир цалчинмур кьюкьлувух ЦIуссалаккуй ивкIссар. Аьрасатнал хIукуматралгу, мунал дурсса чувшиврун лайкьсса кьимат бивщуну, дуллуну дур «Къучагъшиврухлу» тIисса медаль.
ТIюхчардал жяматрал, гъан-маччанал, дустурал чулуха барча уллай, чIа тIий буру Насирдун цIуллушиву, талихI, ужагърай буллугъшиву, дакIниву дугъришиву. Вания тихунмайгу вицIун кабакьиннав дуллалимур бакIуйн дуккан дуллан.
Ина вила кулпатрал, арсваврал, арснал оьрчIал, гъан-маччаминнал, дустурал ххари уллай итаннав.
Вил бивзний ша бацIаннав, тIиртIунин ка дияннав, увкуний махъ бачиннав.
ТIюхчардал, ЦIущуллал жямат, вил дустал, маччами
НахIу-хIалимсса кулпат
Хъусращиял шяравасса Бахулихъал ХIажикьурваннул ва Ккурккуллал шяравасса Къуругълинал душ Лидиял цачIу оьрму бутлай 37 шин хьуну дур. Цаннал иттав ца бурувгсса, бавкьусса, нахIу-хIалимсса вайннал кулпат бусравну бур кIирагу шяраву.
ХIажикьурбан ур органнаву савсъсса, гьармуниву низам ххирасса адамина.Кьунияхъайсса шиннардий зий ивкIун ур ва виваллил иширттал органнаву.
— Жул кулпат хIасул хьуссар 1980-ку шинал. На тачIавгу пашман къавхьура ттула оьрмулул дусну ХIажикьурбан язи угьаврий.
Ва ур аякьа дусса лас, ххаллилсса ппу, хъинсса дус ва маччачу. Вайксса шиннардий цачIу оьрму бутлай ванал ттун цалагу къаччан бикIан къабувссар. Укунсса лас бакIрайн агьну, ттунма бахтти хьушиврун ккалли бувара, — тIий бур Лидия.
Цала оьрмулул дусная рязину ур ХIажикьурбангу. Вайннал эшкьи-ччаврил гьанулий щавшсса кюругу цIакьсса, гъилисса ва рахIатсса хьуну бур.
Цанна дазу-зума дакъа ххирасса Лидия бувсса кьинилущал ва хъаннил байрандалущал барча буллай ур ХIажикьурбан.
Цала аьзизсса Лидия барча буллай ур ХIажикьурбан назмурдал укунсса ххуттардийнугу.
ХьхьинякIсса лачин хьуну,
Ччива лехлан вил ялтту,
Зирангсса чавахъ хьуну,
Ччива гьузун вил лагма.
Ччива, чавахърайн увккун,
Вил къирттаравун агьан,
Вил тIааьн каруннаву
Вищал гъалгъа тIий икIан.
Ня щаращи дуллайсса
КIирисса гъинтнил чIумал
Вил хIаллурдал ххютулу
Игьалаган ччай ура.
КъакIула ясир хьунсса
Вихсса эшкьилул-ччаврил,
Хьунсса нава къашавай
Хъин къашай азарданул!
КIюрххил балай учара
Багърал булбулданущал,
Хьхьувай чIукIри бувара
Къяртлуй щябивкI исущал.
