Цаппара гьантрал хьхьичI ттун бавуна ЧIяйннал шяраваллил магьирлугърал къатлул хъунмур ПатIимат СутIаевал цуппа рязину даврия букьан аьрза буллуну бур, тIар, тIисса хавар. Ялун уруган, ПатIимат личIину оьрму лавгсса инсаннугу чIалай бакъая, дуллалисса давурттавугу карчI дакъа бикIайва. Мунияту ПатIиматлуя цаппара затру бусан ччива.

ХIажимурад ХIусайнов
Буниялттунгу, инсаннал бувтсса оьрмулия, дурсса даврия жунма кIулли так цIа бусраврай личIайшиву. Бигьану оьр­му бутайсса инсантал ттун зун­ттаву бушивувагу къакIулли. ПатIиматлул оьрмугу хъинну захIмат буван багьлагьисса бия.
БакIраяту ПатIимат зий байбивхьуссар Ваччавсса райондалул оьрчIал библиотекалул хъунмурну. ЦIуну дуллали­сса къатри, мюрщисса оьрчIру, цила даврий хьхьичIунну зий ПатIиматлул 18 шин дурссар. Ванил дуллалисса даву чIалай, махъун багьсса ЧIяйннал культуралул къатлул даву ванил щурущи дуванссар тIисса ниятрай, га чIумалсса райкомрал ва гьан бувссар ЧIяйннал магьирлугърал къатлул хъунмурну. Буниялагу, ванил цила пагьму-гьунар ккаккан бувну, дуллалимур гьарца зат сантирай дачин дурссар. Ккаккан дуллан бивкIссар гьарца байраннай ххуй-ххуйсса концертру, пьесарду. Дачин дур­ссар жагьилтуращалсса личIи-личIисса кружокру, хъуниминнан цанна лархьхьусса тяхъашивуртту. ПатIиматлул дуллалисса давриву муданагу чIарав ивкIссар лас Ибрагьинхалил ва щалагу кулпат. Ибрагьинхалиллул дугьайссия циняв махIаттал буванну пьесардал роллу, учай­ссия балай, бищай­ссия щютIуххи. СутIаевхъал кулпат муданмагу гьуртту шай­ссия Дагъусттаннай чIун-чIумуй шайсса кулпатирттал дянивсса конкурсирттавух ва цимилагу ххув хьуссар миннуй, лавсъссар дипломру ва бахшишру. ДукIу, 2015-ку шинал, Сергокъалалив хьусса «Семья Дагестана» конкурсравух гьуртту хьуну, диплом ва багьлул ххирасса бахшиш ларсун бувкIунни.
ПатIиматлул 48 шин дурну дур маданиятрал давурттай зий. Мунийн бувну ва хIурматрай бигьалаган тIайла буклай, Ккуллал райондалул культуралул управлениялул хъунмур Ибрагьимова Маринал, райондалул культуралул зузалтгу бавтIун, ПатIиматлун дунни байран. Шиккун бувкIминнал ихтилатру бувна, ПатIиматлухь барчаллагьрал махъру тIий.
ПатIиматлул райондалул культуралуву дурсса давур­ттал итабавкьусса мархри ялун нанисса никиран дакIния къа­гьантIишиврия ванихь барчаллагь учин шиккун бувкIун бия Ккуллал райондалул администрациялул вивсса политикалул отделданул бакIчи Хизриев Шамххал, ЧIяйннал шяраваллил бакIчи МахIаммадов Ися ва цаймигу къуллугъчитал.
— Жун щинчIав ПатIимат жу­чIавату лавгун ччай бакъая. Жу мунихьхьун суал буллуссия: «ПатIимат, ина хар-хавар бакъа даврия гьан пикри бувуннихха?» — куну. Ванил жухьхьун укунсса жаваб дуллуна: «Букьан буллай лавгссар тIийнияр, сий дунува гьан ччай бура», — куну.
ПатIиматлул хIурмат ЧIяй­ннал жяматрачIагу, культуралул зузалтрал дянивгу хъунма­сса буну тIий дуршиву ва байран кIицI лавгуна цила ихтилатраву Ибрагьимова Маринал. ДР-лул Культуралул министерствалул чулуха ПатIиматлун 50 азарда къуруш дуллуна. Мукунма ванин буллуна ЧIяйннал шяраваллил, Ккуллал администрациялул чулухасса арцул конвертру.
Ванихь барчаллагь тIисса махъру лавхъуна ванищал архIал зий бивкIминналгу. Ккаккан дурна ххуйсса концерт.
Ахирданий ххи буван, Су­тIаева ПатIимат бур ЗахI­матрал ветеран. Ванин дуллуну дур АФ-лул Культуралул министерствалул чулуха­сса ХIурматрал грамота, райондалул чулухасса грамотартту ва личIи-личIисса бахшишру.
Байрандалул ахирданий Па­тIиматлул барчаллагь увкуна цила дуллай бивкIсса даврин укун лахъсса кьимат бищаврихлу. Ва байрандалий щаллу дурна Лакрал гимнгу.
ЧIа учинну вания тихуннайгу ПатIимат СутIаеван цIуллушиву, кулпатраву дакьаву ва цаннан ца бувчIаву.