Лакрал иширттаву узданну чIарав бацIлацIаврийну миллатрал дянив багьавай бусрав хьусса кулпат бур Сиражуттин ва Мариян Илиясовхъал кулпат.

Мариян Илиясова хъинну чIарав бавцIуссар Гъумучиял Хъун клуб тIитIлатIисса чIумал, Мариян Дандамаевал цIанийсса Гъумучиял оьрчIал магьирлугърал школалун пишкаш дурссар Мариян Дандамаевал портрет. Вайннал арснал Марат Илиясовлул ца-кIира шинал хьхьичI ОьрчIал магьирлугърал школалун ларсъссар музыкалул аппаратура.
ЦIанакул щала хIукуматрай кризис дуну, харжру булунссарагу арцу бюджетраву дакъасса чIумалгу вай культуралул чIарав бацIлай бур. Уттигъанну Мариян Илиясовал Гъумуксса библиотекалун пишкаш бунни «Дагестан сквозь призму времени» тIисса лавайсса даражалий итабавкьусса луттирду. Ва бур 1944 шинал Лакрал райондалия Аухуллал аьрщарайн дизан дурсса щархъая ва инсантурая бусласисса лу. Райондалул культуралул зузалт дазу дакъасса барчаллагь тIий бур Илиясовхъал щалвагу кулпатрахь. ЧIарав бацIан бюхълай личIаннав! Зу буллалимур чирину тIайла бацIаннав!
Лида Кьурбанова,
Лакрал райондалул
Культуралул управлениялул каялувчи