ЦIуссалакрал райондалул администрациялий хьунни балугъравун къабивсса оьрчIал иширттал ва миннал ихтиярду дуруччаврил комиссиялул батIаву оьрчIал ихтиярду дуруччаврил комиссиялул председатель Земфира Джержисовал каялувшиндаралу. Мукунма шикку гьуртту хьунни му комиссиялул 12 член.
Ва батIаврийн бучIан бувну бия Банайюртуллал ва ЦIуссамихилтIиял школардал директортал ва протоколлайн лавсъсса оьрчIал нину-ппу. Комиссиялул ххал диргьунни балугъравун къабивсса оьрчIру тарбия баврил хIакъиравусса тIалавшиннарду биттур къадуллалисса нитти-буттал хIакъиравусса шанна административ материал.
Комиссиялул давривун духлахиссар мукунсса оьрчIал низамрал ялув бацIаву ва ми дуклакисса идарарттащал архIал оьрчIал ихтиярду дуруччаву. Комиссиялул председатель Земфира Джержисовал кIицI лавгунни, цаппара оьрчIру дарсру кьаритлай, школарттайн къазанай бушиву. Миннал хIакъиравугу хъирив лавсса ихтилатру хьунни.
З.Джержисовал школардал каялувчитурая тIалав бунни нитти-буттащал оьрчIру тIайлану тарбия баврил хIакъиравусса маслихIат ккаклан ва дурсса даврия комиссиялийн баян буллан.
Микку мукунма ихтилатру бунни комиссиялул инспектор Марина Къаплановал, ЦIуссамихилтIиял школалул директор Париза Адилгареевал, Банайюртуллал школалул сакиншинначи Аймани Султанмурадовал.
