Ччянивагу бусарду Гъумучиял бяр ва мунил лагма-ялттусса кIанттурду бакьин буллалисса давурттая. Ми давурттал лагрулуву вай гьантрай, райондалул ЦСОН-далул директор, райондалул депутатътурал собраниялул хъунама Шяпи Щурпаевлул сипталийну, бакьин буллай байбивхьунни бярнил чIаравсса беседка.
Шяпинал бусласимунийн бувну, ва беседка бан дакIнийну дунияллия лавгун ур ванал буттал бутта Нажмуттин. Нажмуттиннул аманат щаллу бувну бур ванал кулпатрал, Шяпинал буттал ниттил, 1986 шинал. Цуппа дунияллий буссаксса аьпабиву чан хьун къабивкIуна тIар беседкалухсса къулагъас, лагма тIутIив дугьлай, миннуха къуллугъ буллай. Муния мукьах 30 шин ларгунни, беседка бух хьуну, зия хьуну бия. Буттал буттал ва буттал ниттил аьпалун утти Шяпинал цала бакIрайн лавсунни беседка бакьин бан. Гъумучиял жагьилтуращал цачIуну ЦСОН-далул зузалтрал ппив дурунни дух хьусса магъи, дирчунни плита дакьинсса аьрщи. ЦIусса магъи дирхьуну, щях плита даркьуну, цIусса скамейкарду бивхьуну, хьхьувайсса чани бувцуну, лагма тIутIив дугьансса пикрилий ур уттигу Шяпи.
Ванияр хьхьичIрагу Шяпинал лодка пишкаш дурссар. Утти Гъумучиял оьрчI-бакIуннаща, жагьилтураща бюхъантIиссар ва лодкалий бярнийх гайз буллан.
Бярнил лагмасса давуртту уттигу найнна дур. Къуртал шавай бур плита даркьуну, хIадур буллай бур скамейкарду бишинсса кIанттурду.
