Ккуллал райондалийсса хьхьичIва шяраваллал культуралул къатрину бивкIсса клубру кIура баян бувунни Аьрасатнал халкьуннал аслийсса культуралул центрдайн. Мукунсса центрну хъанай бур Хъювхъиял шяравусса цакьнива клуб бивкIсса къатригу. 1-мур сентябрьданий Хъювхъиял шяраву оьрчIал багъ тIитIлатIисса кьини на кIул хьуссияв ва центрданул даврищал.
Ванил директорну зий бия Оьмаева Рукьижат. Ванил цищала архIал центрданий зузисса МахIаммадова Сапижатлущал хъинну ххуйну бакьин бувну бия центрданул къатта.Щялмахъну къахьунссар ва къатта лащан буван буч1ия чIиви-кьивисса музейраха.
Къатлул ца мурцIу чIюлу бувну бия хьхьичIарасса, уттигу хъиннура сийлувун духлахисса къатта-къушливу ишла дувайсса тIахIни-кIичIу, лаххия дирхьуну. ЧIирттай лархъун дия Хъювхъиял шярава Граждан дяъвилуву ва махъсса Хъун дяъвилуву гьуртту хьусса чиваркIуннал цIарду чирчусса сияхIру. ЧIаравра дия шяраваллил фольклорданул ансанбльданул бивтсса шаттирдаяту бусласисса фотомонтаж. Дия шиву мукунна терроризмалийн, наркотикирттайн къаршисса баннерду. Аьрасатнал Президентнал, Дагъусттаннал ва Ккуллал райондалул бакIчитурал суратру ва ттугъру бивхьусса баннерду. Шярава бувксса лахъсса къуллугъирттай зий бивкIсса чиваркIуннал, культуралул зузалтрал, шаэртурал, аьлимтурал учительтурал цIарду чирчусса суратру лархъсса чIярусса баннерду дия. Так-такну центрданул къатлуву диркIми затру кIицI къадулларчагу, шивун увхнан аьлтта чIалай бия Хъювхъиял шяраваллил лавгмур ва уттисса оьрму.
Лажин хIадур дурссар ХIажимурад ХIусайновлул
