ЦIуссалакрал райондалий хьунни Аьрасатнал Ттугълил кьинилун хас дурсса, 5 километралул манзилданийхсса, лечаврил марафон.
Мунил сакиншинначи, ЦIуссалакрал райондалул Жагьилтурал политикалул комитетрал председатель Заур МахIаммадовлул бусаврийн бувну, шикку гьуртту хьунни ЦIуссалакрал райондалул циняв шяраваллавасса оьрчIру. Марафондалий гьуртту хьусса 35 оьрчIай лавххун бия Аьрасатнал ттугълил лишанну дусса футболкарду.
Жагьилтурал дянивсса лечаврил гьунардан кьимат бищун бувкIминнавух бия ЦIуссалакрал райондалул администрациялул хъунаманал хъиривчу Султан ХIамзатов, ЦIуссалакрал райондалул КIулшивуртту дулаврил управлениялул хъунама Руслан МахIанмадов.
Финишрайн цалчин увкIунни Ямансу шяравасса Анзор Мусаев, кIилчин увкIунни ДучIиннал шяравасса Оьмар ХIажимурадов, ванал хъирив увкIунни ЦIуссалакрал шяравасса МахIаммад Шагьмарданов. Ххув хьуминнан дуллунни арцуйнусса бахшишру.
