Вай гьантрай ЦIуссалакрал райондалиясса ЦIуссалакрал шяравасса оьрмулул бугьара хьусса, къинттуллух захIмат буллай бивкIсса ПатIимат Сулайманова 90 шинал юбилейращал барча буллалисса чагъар бувкIунни Аьрасатнал Президент Владимир Путиннуя.
«Жу буниялагу пахрулий ва хIурматрай буссару Хъунмасса Буттал КIанттул цIанийсса дяъвилул шиннардий оьрчIшиву къаккарксса, хъуни-хъунисса захIматру буллай, ххувшаву гъан дуллай бивкIсса цинявппагу та никирал оьрчIая. Тайннал дакIнийхтуну бивхьусса захIматралли та ппурттувусса билаятрал цIакь ва аваданшиву хIасул хьусса. ЧIа тIий ура цIуллушиву, тяхъашиву ва дунияллий дакьаву», — укун чивчуну бур ва чагъарданий.ПатIимат Сулаймановал цила лас Оьмардущал хъуни бувну бур ххаллилсса 3 оьрчI: Амжад тIима арс ур полковник, АхIмад зий ур ккарччал хIакинну, душ Рабият бур ишбажаранчи.
Аьрасатнал Президент Владимир Путиннул чулуха ПатIимат Сулайманова юбилейращал барча буллалисса чагъар тапшур бан вайннал ужагърайн бувкIунни УСЗН-далул пишакар Зарема Аьлиева ва ЦIуссалакрал райондалул Буттал КIанттул ЦIанийсса дяъвилул ветерантурал, захIматрал ва ихтиярду дуруччай органнал советрал председатель Мизраб Шахмилов. Вайннал мукунма ПатIимат Сулайманова юбилейращал барча бунни ЦIуссалакрал райондалул администрациялул хъунама ХIажи Айдиевлул ва УСЗН-далул хъунама Камил Анкалаевлул чулухагу.
ПатIимат Сулаймановал хъамаллурахь бувсунни цила бигьа бакъасса оьрмулия ва дакIнийхтуну барчаллагь увкунни цихра аякьа дан бувкIсса хъамаллурахь.
