Итни кьини, Ххувшаврил 70 шинал хьунийн, Лакрал райондалий Гъумук хьунни Хъун дяъвилул ветерантурал къатрай аьпалул ултти тIитIлатIисса шадлугъ. Муний гьуртту хьунни райондалул бакIчи Юсуп МахIаммадов, райондалул администрациялул бакIчи Абакар Къюннуев,
ванал хъиривчутал, КIулшиву дулаврил управлениялул каялувчи Явсупи ХIамзаев, Аьрасатнал МВД-лул
«Лакский» МО-лул каялувчи Марат МахIмудов, райондалул Хъунисриннал советрал хъунама МахIаммад Ссунгъуров, оьрчIащалсса ва жагьилтуращалсса даврил отделданул каялувчи МахIаммад Гадаев, ветерантурал гъан-маччами ва Гъумучиял школалул дуклаки оьрчIру.
«Аьпалул ултти тIитIаву – му так жула ватанлувтурал дяъвилий дурсса чувшиврун кьимат бищаву ва миннал аьпа абад баву дакъар, шяраваллил ва райондалул тарих ябавур, кьянатсса дяъвилул шиннардий жула халкьуннал бувсса захIматрал аьпа ябавур», — увкунни шадлугъ тIитIлай, Юсуп МахIаммадовлул.
Гъан-маччамигу гьурттуну, тIиртIунни дяъвилия махъсса цалва оьрму хъирив нанисса ник лайкьну тарбия дан захIмат бивхьусса бусравсса педагогтурал АхIмад Шахшаевлул ва Расул Къажлаевлул аьпалул ултти.
Ветерантурал гъан-маччанал бувсунни кIайннал бивтсса дяъвилул ххуллия, барчаллагь увкунни райондалул каялувчитурахь цала гъанчунал аьпа хъамакъабитансса даврихлу.
Юсуп МахIаммадовлул бувсунни укуннасса аьпалул ултти лачIун тIий душиву гьарцагу ветераннал къатрай.
