Июнь зурул 22-нний щалва билаятрай кунна, Лакрал райондалийгу кIицI ларгунни аьпалул ва дягъулул кьини. Райондалул каялувчитал, администрациялул зузалт, идарарттал каялувчитал ва зузалт ватандалухлу жанну дуллуминнансса гьайкалданучIан бавтIун, тIутIивгу дирхьуну, дакIнийн бивчунни дяъвилия зана къавхьуми.
«75 шин ларгунни жула ватандалийн оьсса кьини дуркIния шихуннай. Хъунмасса Буттал КIанттул цIанийсса дяъви – му жула билаятрал тарихравусса яла оьмур кьинир. Билаят душманная буручлан лавгми талай бивкIссар цала чIиримур ватандалухлугу, цала кулпатирттахлугу. Шаназарунния ливчусса чиваркI так ца чIирисса Лакрал райондалиягума зана къавхьуссар дяъвилул цIарава. Буцири гужру цачIун бувссар Ххувшаву ласун, жува бух бан, лахIан бан къашайшиву дунияллун ккаккан бан,» — увкуна аьпалул митинг тIитIлай райондалул бакIчи Юсуп МахIаммадовлул. ЧIа увкуна дакьаву ва паракьатшиву.
Ванал ихтилатрая махъ митинграйн бавтIми цинявппа ца минутрайсса пахъ багьуна, дяъвилий жанну дуллуми дакIнийн бичин.
Гихунмай Лакрал ва Ккуллал районнал аьрали комиссар ХIасан Масуевлул бувсуна Хъунмасса Буттал КIанттул цIанийсса дяъвилуву Лакрал райондалия бувкIсса чиваркIуннал дурсса гьурттушиннарая.
