«Лакрал райондалул жагьилтал экстремизмалийн ва терроризмалийн къаршину» тIисса акциялул лагрулий ларгсса алхIаткьини Гъумук хьунни экстремистурал ливтIусса райондалул полицанал зузалтрал аьпалун хас дурсса аьдатравун дагьсса лачIунбуккаврил турнир.
Турнир дайссар гьарца шинал Ватан дуручлачиминнал байрандалул гьантрай, администрациялул спорткомитетрал, ДЮСШ-лул ва Аьрасатнал МВД-лул «Лакский» МО-лул цачIуну.

Зулайхат Тахакьаева
Райондалул спорткомитетрал хьхьичIунсса пишакар Малик ХIусмановлул бувсуна ва турнир райондалий дуллай байбивхьушиву 2010 шинал Ватан дуручлачиминнал кьинилун хасну ДЮСШ-лул ва Лакрал РОВД-лул зузалтрал: Илияс Кущиевлул, Сайди Ибрагьимовлул, Ислам МахIаммадовлул ва, аьпа биву, Идрис Булатовлул сипталийну. 2013 шинал экстремистурал полицанал зузалт ливтIуния шинмай турнир цIа куну дур къуллугърал бурж биттур буллай ливтIусса полицанал зузалтрал аьпалун.
Турнир тIитIлай, райондалул бакIчи Юсуп МахIаммадовлул кIицI лавгуна къуллугърал бурж биттур буллай ливтIусса полицанал зузалт бивкIшиву хIакьсса ватан дуруччулт ва гайннал аьпа буруччаву хъанахъишиву махъ ливчIминнал абадлий яла къалагайсса буржну.
Турнирданий гьуртту хъана­хъиминнан ва гайннахлу буклан бувкIминнан чIа увкуна так спортрал бяст-ччаллаву багьаваннав зун зула ватан дуручлан, куну.
Муния махъ райондалул магьирлугърал зузалтрал щаллу дурна райондалул гимн.
Аьрасатнал МВД-лул «Лакский» МО-лул каялувчи Юсуп Амировлул дакIнийн бивчуна экст­ремистурал ливтIусса полицанал зузалт: Булатов Идрис, Жяъпаров Ниъматуллагь, МахIаммадов ХIусайни, ХIамзатов Абакар, Исмяилов Апанни, МахIаммадов Рамазан, Къунжуев Амсаруллагь, Оьмаров АьлихIусман, Щамххалов Мурад.
ЛивтIусса полицанал зузалт­рал рухIирдая алхIам бувккуна райондалул имам ХIажимурад Щайхмурадовлул.
Райондалул больницалул хъунама хIакин, «Гъази-Гъумучи» фондрал хъунама АьвдурахIим Дибировлул кIицI лавгуна жу­ла щала оьрму най бушиву тIайладакъашивурттащал, зулмулущал талай.
— 2009-2013 шиннардий жула ххаллилсса чиваркI, полицанал зузалт оьрмулуцIа бувссар, лажин лажиндарайн бувксса талатавриву бакъача, луркIан дур­ккун, ттиликIрахун ккулла бивтун. ХIакьинусса зул талатаву дур дусшиврийсса, лажин лажиндарайн бувксса. Зул дянива так нажагьссар спортсментал буккантIисса. ЧIявуминнал язи бугьантIиссар цайми пишарду. Ци пиша язи бугьарчагу, зу жул вихшалару. Спорт – му дакьавур, цIуллушивур, спорт­рал цIакь дуллалиссар инсантурал дянивсса дусшивугу, чур­ххал цIуллу-сагъшивугу, — увкуна ванал.
Ва турнирданий гьарца шинал гьурттушинна дайсса Ххажалмащиял командалул тренер Юсуп АхIмадовлул кIицI лавгуна Лакрал райондалул каялувчитурал спорт­рах бунияла хъуннасса къула­гъас душиву.
Шиная шинайн хъунна хъанай дур ва турнирданул лагру. Гьашину муний гьуртту хьунни 7 команда: Лакрал, Ккуллал (Ккуллал ва Вихьуллал), Ахъушиял, Гергебиллал, Лаващиял (Ххажалмащиял ва ЦIахъардал), ЧIарадиял районнал ва МахIачкъала шагьрулул. Сайки 300-ннийн бивсса гьурттучитал.
Бяст-ччал хьунни 10 кIушиврул категориялуву – 24 – 63 килолул.
Командарттал дянив ва базилухгу 1-мур кIану бувгьунни ЧIарадиял райондалул командалул; 2-мур кIану – Гергебиллал райондалул командалул; 3-мур кIану – Лаващиял райондалул командалул.
Лакрал ва Ккуллал районная хьхьичIунсса кIанттур­ду бувгьунни: Камалов Кьур­банмахIаммадлул (24 кг., Ккуллал команда), 2-мур кIану;
Ханов ХIасанбасрил (26 кг., Гъумучи), 3-мур кIану; Ханов Иманаьлил (29 кг., Гъумучи), 1-мур кIану; Оьмаров Мурадлул ва Оьмариев Мухтардул (32 кг., Ккул), 3-мур кIану; М. Оьмаровлул (38 кг., Ккул), 3-мур кIану; Насухов Юсуплул (50 кг., Гъумучи), 3-мур кIану;
Исмяилов Рустамлул (58 кг., Гъумучи), 2-мур кIану.
Ххув хьуминнан ва хьхьичIунсса кIанттурду бувгьуминнан буллуна дипломру ва арцуйнусса бахшишру. Дуллуна хасъсса бахшишругу. Турнир дан чIарав бавцIуминнан буллуна Барчаллагьрал чагъарду.
КIира-шанна шинай Лакрал райондалий лачIунбуккаврил тренерну зий ивкIсса, хIакьину тIурча МахIачкъалалив Аьли Аьлиевлул цIанийсса школалий зузисса Ажуев Заур увкIун ия цала вардиш буллалисса оьрчIру бувцуну.
— КIану къабугьарчагу, укунсса турнирдай гьуртту хъанай хъин­ссар оьрчIан. Вардиш шайссар. УчIаврия навагу пашман къавхьура, оьрчIругу къавхьунни. Лакрал райондалий ларайсса сакиншиндарай шай турнирду. Чун-бунугу турнирданийн лавгсса чIумал дук­ра хъунмурчIин жура ласайссар. Лакрал райондалий гьуртту хьун бувкIцири, ми циксса бухьурчагу, мудангу дукралул щаллу бай, — тIий, барчаллагьрай ия вагу турнирданул сакиншинначитурайн