Сентябрь зурул 18-нний ХI. ЦIадассал цIанийсса Мазрал, литературалул ва искусствалул институтрал конференц-залдануву хьунни филологиялул элмурдал доктор, профессор Ханнал арс Сулайман АхIмадовлул оьрмулул 80 шинан хас бувсса элмийсса сессия.
Сессия тIигу-тIивтIуну, нани бувну ия институтрал директор, профессор Ибрагьимлул арс МахIаммад МахIаммадов.
Сулайман АхIмадовлул Дагъусттаннал литература ахттар даврил дунияллий бивхьусса захIматрая, бартдиргьусса элмийсса давурттая гьарта-гьарзану бусласисса докладру бувуна Малик ХIусайновлул («Дагъусттаннал литературоведениялуву С. АхIмадовлул бивхьусса бутIа») ва Кьурбан Акимовлул («Дагъусттаннал литературоведениялул патриарх»).
Юбилярнал оьрмулун ва творчествалун хас бувсса махъру лавхъуна: профессор Эса Аьбдуллаевлул, профессор АьлихIажи Аьбдуллаевлул, филологиялул элмурдал доктор АхIмад Муртузааьлиевлул, профессор Аьвдулкьадир АьвдуллатIиповлул, Дагъусттаннал халкьуннал шаэр Ссугъури Увайсовлул, Дагъусттаннал халкьуннал чичу Мирза Давыдовлул, Дагъусттаннал Чичултрал союзрачIасса лакрал секциялул каялувчи Илияс МахIаммадовлул ва м.ц.
Сессиялия махъ хьуна тяхъасса ва буллугъсса банкетралмур мажлисгу.
Жул корр.
