Ноябрьданул 29-нний МахIачкъалалив Расул ХIамзатовлул цIанийсса Миллатрал библиотекалуву хьунни Дагъусттаннал халкьуннал шаэр, чичу, публицист Космина Исрапиловал оьр­мулул юбилейран хас дурсса вечер. Ваниннингу юбилейрал мажлисру хьуссар шагьрулул цаймигу идарарттай, миннувух ДГУ-рал филологиялул факультетрайгу.

Бадрижамал Аьлиева
Ва кьинигу шаэр юбилейращал барча буван бувкIун бия биялсса халкь.
Вечер дачин дурсса жагьилтурал бувсунни Космина Исрапиловал оьрмулул ва творчествалул ххуллурдал агьамми муттардия.
Бувну бур Космина 1961 шинал Лакрал райондалийсса Шахьуйннал шяраву, 1978 шинал къуртал бувну бур МахIачкъала шагьрулул 5-мур школа, 1984 шинал – ДГУ-рал филологиялул факультет, 2005 шинал – Финансирттал ва правалул институтрал юридический факультет. Арулла шинай зий бивкIун бур «ЧIавалачин» журналданул корреспондентну, ДР-лул кIулшиву дулаврил ва элмулул министрнал маслихIатчину, ДР-лул Миллатрал политикалул, информациялул ва кьатIаллищалсса дахIавурттал министерствалул агьамма пишакарну, ДР-лул Президентнал Управлениялул информацион политикалул хьхьичIунсса пишакарну. Ва бур паччахIлугърал къуллугърал 3-мур классрал МаслихIатчи. Аьрасатнал Чичултрал ва Журналистътурал союзирттал член, Аьрасатнал Политологтурал ассоциациялул член, ДР-лул культуралул лайкь хьусса зузала, ДР-лул ПаччахIлугърал премиялул лауреат, Москавлийсса «Аьрасатнал КIяла кьурукьирттал» жюрилул член, 18 луттирал автор.
Хъирив махъ буллунни ДР-лул культуралул министрнал хъиривчу Мурад ХIажиевлухьхьун. Мунал дурккунни ДР-лул культуралул министр Зарема Буттаевал чулухасса барча баврил адрес. Муний чIурчIав дурну дия Да­гъусттаннал шеърилугъ, журналис­тика хьхьичIуннай давриву Космина Исрапиловал бивхьушиврий хъунмасса бутIа, ванил цIа машгьурну душиврий, Дагъусттаннай дакъа, Аьрасатнавугу, республикалийгу, архну мунил дазул кьатIувгу бушиву ванил буккулт шаэр, чичу хIисаврайгу, журналист хIисаврайгу. Гихунмай махъру лавхъунни Расул ХIамзатовлул цIанийсса дунияллул халкьуннал дянивсса фондрал вице-президент, ДР-лул Жяматийсса палаталул член ХIабибат Аьзизовал , шаэр, Аьрасатнал Чичултрал союзрал член, Дагъусттаннал лайкь хьусса учитель Даниял Магьдиевлул, философиялул элмурдал доктор Асият Буттаевал, Дагъусттаннал Гуманитарный институтрал ректор, ДГУ-рал оьрус мазрал литературалул кафедралул доцент Булатов Мурадлул, ДР-лул Чичултрал союзрал секретарь, ДР-лул Халкьуннал Мажлисрал Миллатирттал дянивсса арардал, жяматийсса ва диндалул сакиншиннардил комитетрал председательнал хъиривчу Людмила Авшалумовал, ДР-лул культуралул лайкь хьусса зузала Макьсуд Зайналаьбидовлул, яруссаннал чичу Хизри Дидойскийл. «Лакку билаят» цIанилусса жяматийсса ккурандалул чулуха Космина Исрапилова барча бунни Нураттин Юсуповлул. Махъру лахълахъими цинявппагу кIицI лаглай бия Косминал творчество видурцIуну душиву аьрщарайсса цимурца рухI думунихсса ччаврил, буттал кIанттухсса, аьзиз­сса дагъусттаннахсса ччаврил, хIурматрал.
Космина Исрапиловал му­къурттийсса балайрду щаллу бунни ДР-лул искусствалул лайкь хьусса ишккакку, ПаччахIлугърал опералул ва балетрал театрданул артистка Жанна Кьурбановал, ПаччахIлугърал опералул ва балетрал театрданул солистка Уза ХIамидовал, ДР-лул лайкь хьусса артистка Загьидат Муслимовал.
Косминал назмурду дурккунни ДР-лул искусствалул лайкь хьусса ишккакку, актриса Зумрут Салангереевал, ДГУ-рал ва ДГПУ-рал филологиялул факультетирдал студентътурал, шагьрулул 5-мур лицейрал 9-мур класс­рал дуклаки душ, шаэрнал шяравадуш ПатIимат Усттаровал, шагьрулул 33-мур гимназиялул 8-мур классрал дуклаки душ, чичу Абакар Мудуновлул душнил душнил душ Халун Чаллаевал, мукунма шагьрулул цаймигу школардал дуклаки оьрчIал ва Республикалул оьрчIал библиотекалучIасса «Истоки вдохновения» цIанилусса творчествалул клубрал члентурал.
Вечер щаллу хьунни на­хIу-нацIурдал ссупралух, дакIнийх­тунусса ихтилатирттайну. Ми­ккугу хьунни ихтилатру шаэрнал савлугърансса, дурккунни мунил назмурду.