Расул ХIамзатовлул цIанийсса Национал библиотекалул конференц- залдануву хьунни республикалий цIа ларгсса аьлимчу, тарихчи, шаэр, просветитель Алкьадарил династиялиясса «Созвездие Алкадари» тIисса документал журалийсса киносуратрал презентация.

ПатIимат Рамазанова
[dropcap]В[/dropcap]а проектрал авторну бур машгьурсса тележурналистка Гулера Камилова. Ванил бувсунни киносурат хас дурну душиву философиялул элмурдал доктор, академик Аьвдуссалам ХIусайновлул 80 шинал юбилейран ва Сулайман Стальскийл райондалун 90 шин шаврил юбилейран. Ва даврил сиптачинугу ур кIицI лавгсса райондалул хъунама Нариман АьвдулмутIалибов. Суратру ларсун дур Москавлив, МахIачкъалалив, Кьасумкантлив ва лазгиял цаймигу шяраваллаву.

-Шанма зуруй зий буссияв на ва киносуратраха, канилчичрурдал фондирттаву, архиврдаву докумерт­ру лахьлай, луттирду ххилтIу буллай, ХIасан –апанни Алкьадарил творчествалул ирс лахьлай. Ттун бувчIунни Дагъусттаннал тарих ттигу хъирив лавну лахьхьин бувашиву, ларгсса аьсрулий ярг- яргсса инсантал бивкIшиву, — увкунни Гулера Камиловал.

Ванил дурсса ххаллилсса даврихлу барчаллагь тIий, Нариман АьвдулмутIалибовлулгу бувсунни Алкьадарил агьлулия 20 элмурдал доктор ва кандидат ивзшиву, Социалист ЗахIматрал Виричу, Дусшиврул ва Лениннул орденну ларсъсса машгьурсса инсантал бувкшиву.

Презентациялий ихтилатру бунни Национал политикалул ва диндалул иширтталсса буллали­сса министр Энрик Муслимовлул, Халкьуннал Мажлисрал комитетрал председательнал хъиривчу ХIамидуллагь МахIаммадовлул,, филологиялул элмурдал доктор МахIаммад МахIаммадовлул , профессор, литературовед ХIажи Гашаровлул ва цаймигу бусрав­сса инсантурал.