Ларгсса нюжмар кьини Гъумучиял дянивмур даражалул школалий хьунни райондалул администрациялул зузалтрал лавайми классирттал дуклаки оьрчIащалсса Ватан Дуруччултрал кьинилун хас дурсса хьунабакьаву.
Муний гьуртту хьунни ДР-лул Аьрали комиссариатрал Лакрал ва Ккуллал районнал отделданул каялувчи ХIасан Масуев, Авгъаннавусса дяъвилул гьурттучи ХIусман Маммаев, кIирагу райондалул Авгъаннал дяъвилул Ветерантурал советрал хъунама Гъапур Оьмариев, райондалул администрациялул террорданийн къаршисса даврил отделданул каялувчи Щамххал Сайпуллаев, «Ххяххабаргъ» кказитрал редактор Мусалав Мусалаев.Хьунабакьаву тIитIлай, администрациялул оьрчIащалсса ва жагьилтуращалсса даврил отделданул хъунама МахIаммад Гадаевлул барча бувна ялун нанисса байрандалущал.
ХIасан Масуевлул бувсуна Хъунмасса Буттал кIанттул цIанийсса дяъвилуву Лакрал райондалул чиваркIуннал дурсса гьурттушиндарая, хIакьину Аьрасатнал аьралуннаву хъанахъисса цIушиннардая.
Щамххал Сайпуллаев авцIуна Аьрасатнал паччахIлугърал бакIчитурал дунияллул терроризмалущал талансса программа райондалул террорданийн къаршисса комиссиялул ва отделданул цукун ишла дуллай буссарив, му программалул лагрулуву ци давуртту дурссарив. Мусалав Мусалаевлул бувсуна террорданийн къаршисса материаллу чIумуя-чIумуйн дуккайшиву «Ххяххабаргъ» кказитрай.
Гьантрал хьхьичI билаятрай Совет аьрал Авгъаннава буккан бувну 27 шин хъанахъисса кьинигу кIицI ларгун духьувкун, ХIусман Маммаевлул бувсуна тай иширттая, та дяъвилуву цалла дурсса гьурттушиндарая, хIакьину дунияллийсса тагьардания, западрал билаятирттал Аьрасатнащалсса арардая.
