![](https://ilchi.info/wp-content/uploads/2020/07/1111-1-300x300.jpg)
[dropcap]Д[/dropcap]акъахьунссар хIакьину алвагьсса Аьрасатнаву чIярусса шиннардил мутталий миналулгу хьуну, цивппа яхъанан язи бувгьусса шагьрурдал ва щархъал тарихирттаву чIиви-хъунсса кIанттурду къабувгьусса жула ватанлувтал бакъасса царагу регион.
ЧIиримур Ватандалия архну, лак, ярусса, дарги, лазги, къумукь къакуну, ца кулпат кунма, дагъусттанлувталлу тIий яхъанай бур ми. Адигнал Республикалул хъуншагьру Майкопрай 20-хъул шиннардий ххишалагу зий, жула дагъусттанлувтурал мурадру бартбигьлай бур Дагъусттан Республикалул ХIукуматрал чулухасса муданмасса вакилхана. Ванил хъунаманугу ур Асилдаров Чупан Юсуплул арс.
Залму АьбдурахIманова
Вакилханалул даврил мурадгу бур, тих яхъанахъисса жула дагъусттанлувтуращал цIакьсса дахIавугу дурну, ватанлувтурал личIи-личIисса мурадру бартбигьлагьисса ва цала дуллалисса давурттал лагма лаган буллансса. Тикку дуклакисса жула студентътал бикIу, тиккува ялапар хъанахъисса жула ватанлувтал бикIу, вакилханалул хIарачатрайну гьуртту шайсса бур тайннал республикалий дуллалисса циняр шадлугъирттайгу.
![](https://ilchi.info/wp-content/uploads/2020/07/3333.jpg)
Ларгмур шинал жулла республикалий бандформированияртту ххит дурну 20 шин шаврин хасну, Дагъусттан Республикалул БакIчинал хIукмулийн бувну, юбилейрал медаллу дуллуссия къачагътурайн къаршину бавцIуну бивкIминнан. Медаллу дуллуминнавух бур та чIумал Адиг Республикалул БакIчину ивкIсса Аслан Джаримов ва Госдумалул депутатну бивкIсса Разият Натхолунгу. Юбилейрал медаллу дуллуминнавух бур Майкопрай яхъанахъисса жула лаккучу, ЧIяйннал шяравасса Аьлиев Аьли МахIаммадшариплул арс ва Кьурагьиял шяравасса лазгиричу Рамазанов Эдуард Рамазаннул арсгу.
Майкопрайсса жула вакилханалул хъунама Чупан Асилдаровлул цачIанма оьвкуну, вай кIинналагу хъазамирттай медаллугу ларчIунни.
Увну ур Аьли ЦIуссалаккуй. 1993 шинал школагу къуртал бувну, дуклан увххун ур Буйнакскаллал шяраваллил хозяйствалул техникумравун. Миву дуклакисса чIумул дянив аьрали къуллугъгу лавхъун, техникумгу къуртал бувну, заочнайну къуртал бувну бур институт. Кулпатгу бувну, цIана Аьли яхъанай ур Майкопрай.
Ванал ппу МахIаммадшарип къакIулсса нажагьсса акъахьунссар ЦIуссалаккуй. Ва ивкIун ур чIярусса орден-медаллан лайкь хьусса Хъун дяъвилул ветеран.
Ванал ва Эдуардлул чялишсса гьурттушинна дайсса дур тийх дуллалисса циняргу давурттавух, чирилул акциярттавух ва цаймигу жула ватанлувтал бавтIсса жура-журасса иширттавух.
Жула чулухагу Аьли барча уллай, чIа учин ччай бур цIуллушивугу, каши-кьудратгу.