Февраль зурул 6-нний ЦIуссалакрал райондалул администрациялий хьунни ляличIисса агьамшиву ва хъуннасса нигьачIаву дусса, мукунма чIявусса инсантал батIайсса кIанттурду ххал байсса райондалул комиссиялул заседание.
Заседание дачин дурну ия ЦIуссалакрал райондалул администрациялул бакIчинал хъиривчу Гайдарбек Мусаев. Шикку гьуртту хьунни ЦIуссалакрал райондалул ОМВД-лул полициялул хъунаманал хъиривчутал ХIусман Хаджиев ва Юнус Алимов, ПОО ГООО-лул хъунама инспектор, полициялул капитан Мурад Ибрагьимов, КIулшивуртту дулаврил управлениялул хъунаманан кIанайсса Расул Атлангереев, райондалул АТК-лул хьхьичIунсса пишакар Ибрагьим Хайбуллаев.
2016 шинал цала-цала идарарттал даврил хIасиллу дуллалисса ихтилатру бунни ихтиярду дуруччай органнал вакилтурал ва КIулшивуртту дулаврил управлениялул хъунаманал. Хъирив ххал бивгьунни ляличIисса агьамшиву ва хъуннасса нигьачIаву дусса объектирттал сияхIраву дахханашивуртту даврил масъала. Мунил хIакъиравусса гьарицаннал пикрирду хIисавравун лавсун, комиссиялул члентуращалгу маслихIат ккавккун, цIусса постановлениялий цIакь бан увкунни.
ЛяличIисса агьамшиву ва хъуннасса нигьачIаву дусса объектру ххал байсса комиссиялийн кIицI лавгсса объектру цила чIумал ва багьайкун личIлулну ххал бан тапшур бунни, ми террорданул иширттая мюхчанну бикIан.
