Ттигъанну Лакрал райондалийн даврил аьрххилий бувкIун бия ДР-лул связьрал ва телекоммуникациярттал министр Сефер Аьлиев, ванал хъиривчу Марина Оьмарова, Халкьуннал Мажлисрал депутат, Миллатирттал дянивсса арардал, жяматийсса ва диндалул ккураннал комитетрал хъунама Камил Давдиев, республикалул агьалинан паччахIлугърал ва муниципал хIаллихшиннарду щаллу дайсса МФЦ-лул хъунама ХIусман Хасбулатов.

Зулайхат Тахакьаева
Вайннал аьрххилул мурад бия паччахIлугърал ва муниципал хIаллихшиннарду дузал даврийн багьайсса 210-мур Федерал закон зузи даву. МФЦ-лийн даврийн кьамул буллалисса зузалтрал кIулшиву ххал дан бувкIун бия Связьрал ва телекоммуникациярттал министерствалул пишакартал.
Ва масъалалул ялув Лакрал райондалул администрациялул актовый залдануву хьунни Лакрал ва Ккуллал районнал идарарттал каялувчиталгу гьур­ттусса батIаву. Му тIитIлай, Лак­рал райондалул бакIчи Юсуп МахIаммадовлул кIицI лавгуна 210-мур Федерал закон зузи даву республикалий агьамсса кIанттай душиву ва райондалийгу му аралуву хъуннасса даву дурну душиву. Компьютерданувун ларсун дусса дур 600 муниципал хIаллихшинна, рирщуну дусса дур 300 хIаллихшинна. Щалла даву дуллай бусса бур хъунмурчIин администрациялул пишакартал, шяраваллал бакIчитал ва школарттал директортал тIурча хьхьарану зий бусса бур му закон зузи давриву. МФЦ-лий зунсса 16 кIанттайн конкурсрайн документру буллуну бусса бур 34 инсаннал. Бувсуна даврийн кьамул бантIишиву Связьрал ва телекоммуникациярттал министерствалия бувкIсса пишакартуран кIулшивурттай дакI даркьуми. КIицI лавгуна райондалул администрациялий зунсса пишакарталгу конкурсрал гьанулий кьамул байшиву.
Связьрал ва телекоммуникациярттал министр Сефер Аьлиевлул бувсуна 2010 шинал март зурул 27-нний кьамул дурсса 210-мур Федерал закондалийн бувну, 2011 шиная гихунмай биттур дуллан багьлай бивкIшиву му закондалуву ккаккан дурсса давуртту, хьхьичIра-хьхьичI паччахIлугърал хIалл­ихшиннарду сияхIрайн ласун. КIицI лавгуна ми давуртту Лакрал райондалий Ккуллал райондалийнияр ххуйну дуллай бушиву. 660 хIаллихшинналува цаппарасса документру бивщуну бушиву, лирчIмур давугу бакIуйн ду­ккавай душиву. Гьарца шяраву аьркинсса давуртту дурну духьурчагу, хьхьичI бивхьусса мурадругу биттур бан багьлай бушиву. Бувсуна букъавчIайсса суаллал ялув министерствалул зузалтрал аьркинсса методичес­кий кумаг бантIишиву.
— 2012 шинал июль зурул 1-нния шинмай субсидиялул центрданийн увкIсса инсаннахь бикIан аьркинссар шанма документ – паспорт, къатлул лу ва зузи кIанттаясса справка, ливчIми документру тIурча аьркинссар центрданул зузалтрал цалва батIин. УвкIсса инсанная цаймигу документру тIалав буллансса ихтияр центрданул зузалтрахь дакъассар, агарда тIалав булларча, центрданул каялувчи жаваблувшиннарайн кIункIу ан аьркинссар. Уттинин испольнительныйсса власть ва МахIачкъала шагьру ишла дуллай бивкIсса 116 хIаллихшиннарал ялун ххи дурссар электрон журалийн дурцусса 23 хIаллихшиннагу. Инсаннахь дуссар ихтияр цува чув ухьурчагу электрон журалий хIаллихшинна тIалав дан, центрданул зузалт тIурча буржлувссар миннан кумаг бан. МФЦ сакин буллалиссар хIаллихшиннарду даврил даража ххуй баву мурадрай, — увкуна Сефер Аьлиевлул.
Ванал бувсуна агьалинахь паччахIлугърал ва муниципал хIаллихшиннарду дузал даврил тагьар хIакьинусса кьининийн цукунсса дуссарив ва МФЦ-лул зузалт гихунмай цукун зун аьркинссарив.
Связьрал ва телекоммуникациярттал министрнал хъиривчу Марина Оьмаровал кIицI лавгуна МФЦ-лул давривусса диялдакъашивуртту. Хаснува ми диялдакъашивуртту душиву идарарттал зузалтрал дагьайсса кIулшивуртту дакъашивруцIун дархIусса ва мунийн бувну МФЦ-лул зузалтран багьлай бушиву министерствалул пишакартурачIа кIулшиву ласун.
ХIусман Хасбулатовлул балжину бувсуна многофункциональный центрданул агьалинан буллалисса паччахIлугърал ва муниципал хIаллихшиннардая. Агьамми хIаллихшиннарду ду­сса дур социал, аьрщарал ва хъуслил, паспортно-визовый къуллугърал ва частныйсса хIаллихшиннарду: автомобиллу ва къатри буруччаврил, юридический кумаг баврил ва му ба­къассагу, МФЦ-лий бюхъан тIий бусса бур самолетирттайнсса ва поездирттайнсса билетругу машан ласун.
КIицI лавгуна МФЦ-лул даврил ххуймур ккаккия хъанахъишиву миккун агьали заназаву, масалдаран ларгсса шинал Каспийскалий МФЦ-лул щаллу дурну дур 38 азарва хIаллихшинна.