ЦIуссалакрал райондалий Чараваллал шяраву хьунни Авгъаннаву интернационал бурж лахълай бивкIсса аьралитуращалсса хьунабакьаву. Аьдатравун дагьсса вай хьунабакьавурттал билаятрал кьатIув аьрали бурж лахълай бивкIминнал кьадру гьаз буллай бур.

Хьунабакьаврийн оьвкуну бия ЦIуссалакрал райондалиясса Авгъан дяъвилул ветерантал ХIамзат Атиевлуйн, ХIабиб МахIанмадовлуйн, ВахIид Аьлиевлуйн ва Вахарсолт Вагьабовлуйн. Хьунабакьаврил мурад бия дуклаки оьрчIру Авгъан дяъвилуву гьуртту хьуминнащал кIул баву, миннал виричушиврун лайкьсса кьимат бищаву. Школалул педагог-организатор Мариям Телуевал барчаллагь увкунни Авгъан дяъвилул ветерантурахь гьар мудангу оьвкусса чIумал школалийн букIлай, шикку дуллалисса давурттавух чялишсса гьурттушинна дуллай тIий.
— Билаятрал тарихраву цалла лажин кьадиртсса вай ишир­ттах жяматрал бургаву цакуц­сса да­къахьурчагу, ва дяъвилул цIараву талай бивкIсса, ва захIматсса кьини лархъсса вирттал ялун нанисса никиран эбратну хъанахъиссар, — увкунни Мариям Телуевал.
Цанма ккавкмуния, бакI­рачIан бувкIмуния бувсунни ЦIуссалакрал райондалул Авгъан дяъвилул Ветерантурал советрал председатель ХIамзат Атиевлул. Ванал буллунни школалул коллективран, ялун нанисса ник тарбия даву мурад­рай бихьлахьи­сса захIматрахлу, барчаллагь тIисса чагъар ва чIа увкунни аьралуннаву къуллугъ буллан гьантIисса жагьилтуран тIайлабацIу.
Дуклаки оьрчIал бувккунни дяъвилиясса шеърирду, увкунни балайрду. ОьрчIал хIадур бувсса «А ну-ка, парни» тIисса бяст-ччалливу гъирарай гьуртту хьунни шиккун бувкIсса ветеранталгу. Вай конкурсирдавух оьрчIащал ветеранталгу гьуртту шаврийну хьунабакьаву хъиннура тяхъану, хIазну ларгунни. ОьрчIавунгу укунсса хьунабакьавуртту ччя-ччяни дуллансса гъира-гьавас бувтунни.
Ахирданий Авгъан дяъвилул ветерантурал дуклаки оьрчIащал Ватан ххирану дикIан аьркиншивриясса, тарбиялиясса бюххансса ихтилатру бунни.
Лажин хIадур дурссар
А. Аьбдуллаевал