Ххуллун кьини Лакрал райондалий хьунни Дагъусттаннал ххуллурдал управлениялул каялувчинал хъиривчуну зий чIярусса шинну дурсса, Дагъусттан Республикалул ва Аьрасатнал лайкь хьусса строитель Оьма­ри Аскандаровлул гьайкал тIитIлатIисса шадлугъ. Гьайкал тIиртIунни ЯтIул ламуй.

Шадлугърайн бувкIун бия бусравсса хъамал: ДР-лул Ххуллурдал хозяйствалул агентствалул каялувчи Загьид Хучбаров, Аьрасатнал Жяматийсса палаталул член Айгун МахIаммадов, ДР-лул Экономикалул министерствалул отделданул каялувчи Ибрагьин Багъдуев, Дагъусттан Республикалул Жяматийсса палаталул хъунаманал хъиривчу Ссапар Аьбдуллаев, «Дагестан» ВГТРК-лул хъунама директорнал хъиривчу Ссалам Хавчаев ва чIявусса цаймигу, Оьмари Аскандаровлул дустал, гьалмахтал, шяравучутал.

Зулайхат Тахакьаева
Шадлугъ тIитIлатIисса ихтилатраву Юсуп МахIам­мадовлул кIицI лавгуна райондалул бакIчи хIисаврай цанма мудангу тIааьнну бикIайшиву Оьмари Аскандаров цува кIулцириннал дакIурдиву хIакьинугу уттавану ушиву, ганал аьпалул хIурматгу бюхттулну буручлай бушиву.
«Ххуллурду – оьрмулул туннурдур», учай жула. Му мяйжаннугу мукун бушиву исват хьунни Оьмари МахIаммадовичлул цала буттал шяравун ламу байхту, Кьукуннал шяравалу цIудуклай дайдирхьувкун. ХIакьину ва шяраву цавагу бакъа­ссар ургала акъа, лекьавай­сса тагьарданий ливчIсса къатта. Кьукуннал жямат цивппагу цайва бумур буллай бур шяраваллил тарих буруччин, цIудуккан дуллай бур тарихрал гьайкаллу, дуллай бур шяраваллил инфраструктура хьхьичIуннай дансса давуртту. Миннавух кIицI бан бюхъан­ссар ДР-лул виваллил иширттал министр Аьбдурашид МахIаммадов, уссурвал Ссунгъуровхъул. Зурдардил хьхьичI тIитIарду Мурад ЦIаххаевлул цIубуккан був­сса хьхьичIавасса мизит», — увкунни ванал.
«Оьмари МахIаммадовичлун асар хьухьунссия цала оьрмулул ахир гъан хъанай душиву, ца кьини ванал Загьид ХIажиевичлухь увкуну бур: «Ттул ххаллилсса библиотека буссар, амма шивун хъинну чан­сса инсантал бакъа бухлай бакъар. Мунихлуну на ва библиотека вин буллай ура», — куну. Ваналгу биб­лиотека бишинсса кIанугу лявкъуну, миву ххуйсса ремонтгу дурну, цала жиплива харжгу бивхьуну, уруглансса инсангу ивтун ур, мивун лях-карах бухьурчагу Оьмари МахIаммадовичлул гъан-маччами, дусталгу буххаваншиврул.
ХIакьину-гьунттий тапшур бантIиссар Гъумуча ШавкIравсса ххуллул шанбачIулия КIулушацI­рал шяравунсса ххуллу, му лахъи бантIиссар кIихунмай Ххюлусмав ва Буршайн бияннин. Зунмагу дакIний бухьунссар, КIундивсса ххуллу инсан гьан-учIан захIматсса бикIайва. Райондалул бакIчину увчIлачIисса чIумал на махъ буллуссия ва ххуллу банна куну. ТIай­лассар, данна куцири давуртту дан бюхълай бакъар. Амма ва ххуллу ЧIарав бияннин буллай буссар.
Ккуллал райондалийн нанисса ххуллу кутIагу, бигьагу баншиврул, ШавкIрату Щарав бияннин буллалисса ламул проектно-сметная документация щаллу хьуну дур, умуд бур чIал къавхьуну буллай байбишинссар тIисса. Щалагу Ухссавнил Ккавкказнаву укун­сса ламу ба­къассар, тIий ур Загьид ХIажиевич. Ва бикIан тIий бур 150 метралул лахъишиврий­сса хъунмасса ламу. Ва гьалмахчу ххуллурдал идаралул каялувчину авцIуния шинай жула райондалий ттинин къадурсса давуртту дур­ссар. Оьмари МахIаммадовичлул гьайкал дансса сиптачигу Загьид ХIажиевичри. Райондалул чулухагу кумаг банну увкукун, чачIавсса къуруш харж къадурну, цала харжирацIух дан ччай ура увкуну, дурунни ванал,- ххи бунни Юсуп МахIаммадовлул.
Райондалух дуллалисса къула­гъасрахлу, райондалул депутатътурал хIукмулийн бувну, Загьид Хучбаровлун дуллунни «Лакрал райондалул бусравсса гражданиннал» цIа.
Гьайкалдания пардав дуркьуна Загьид Хучбаровлул, Оьмари Аскандаровлул арснал МахIаммадлул ва ттаттал бусрав­сса цIа дирзсса арснал арснал Оьма­рил.
Загьид Хучбаровлул цала ихтилатраву кIицI лавгуна Оьмари МахIаммадович хьушиву Да­гъусттаннай ххуллурду буллай байбивхьусса цалчинсса пишакартуравасса ца. Ххуллурдал идаралий зий ванал хьуну дур 40-нниха лирчу­сса шинну. Ва чIумул мутталий ванал бувну бур ттуршвахъул ламу, цимирагу ттуршра километр хху­ллурдал.
«Оьмари МахIаммадович «Дагавтодорданул» тарихрал ца яргсса бутIар. Му тарихгу жува буржлув­ссару аякьалий буруччин, жула улча хьхьичIунмай бан захIмат бивхьу­сса инсантурал цIарду хIурматрай ядан. Оьма­ри МахIаммадович кунмасса инсантурал бувгьусса гьаннарайнур хIакьину жулла ккаккияртту хьхьичIунсса дусса.
Оьмари МахIаммадович ия хIакьсса патриот. Ванал чIявусса бувссар цала шяраваллин ва ватандалун. Шиккун бувкIсса оьрмулул хъуниминнан кIулссар, Ташкапурдал ламуя тIайла хьуну, шихунмайсса ххуллийх асфальт бавкьу­ссар. Тани на шиккусса давурттал прорабну зий уссияв. Ххуллурдал идаралий зий буссия лайкьсса каялувчитал, лайкьсса хъунмур ник. ХIакьину жува буржлувссару миннал аьпа абад бансса давуртту ду­л­лан, жагьилсса ник миннал эбрат­рай тарбия дуллан. Миннал ххуллийх гьансса лайкьсса пишакартал хIадур баншиврул, гьашинусса шинал жу идаралул харжлугърацIух Аьрасатнал хьхьичIунсса идарарттавун дуклан тIайла уккарду 12 инсан. Оьмаригу тIайла уккантIиссар, агарда ванан цала ттаттал ххуллийх гьан ччай бухьурча», — увкунни Загьид Хучбаровлул.
Бувсунни Республикалул БакIчи хъуннасса къулагъас дуллай ушиву ххуллурдал отраслилух. Мунийн бувну ва аралуву дахханашиннарду хьушиву махъсса шанна шинал. Кьура шинал ккаккиярттал хIасиллу дуллалийни, яла тIайлабацIусса хьуну дур 2008 шин – бивхьуну бур 101 азарда тонна асфальтрал ва бетондалул. 2015 шинал бивхьуну бур 228 азарда тонна асфальтрал ва бетондалул. Мунищала архIал Загьид Хучбаров мукIру хъанай ур, районнал ДЭП-ирдачIа зунсса техника диялну дакъашиврийн бувну, давриву захIматшиву хьунадакьлай душиврий. Рамазан АьбдуллатIиповлул махъ буллуну бур гьашину 500 млн. къурушир­ттал итабакьин ДЭП-ирдансса техника ласун.
«Жул хIарачатру хъунмур никирал аманатру биттур баншиврул­ссар», — увкунни цала ихтилат къуртал буллай Загьид Хучбаровлул.
Айгун Халидовичлул бувсуна цува шяраваллил хозяйствалул министр­ну зузисса шиннардий Оьма­ри Аскандаровлул, Шяраваллил хозяйствалул министерствалул шяраваллавунсса ххуллурдахгу къулагъас дикIан аьркинссар тIий, ххуллурдал техника тIалав дайсса диркIшиву. Шяраваллил хозяйствалул министерствалулгу кумаг бувну, Оьмари Аскандаровлул хIарачатрацIух тIивтIуну бур Ккуллал райондалийн нанисса Аьхъардал ххуллу.
Ссалам Хавчаевлул бувсуна Оьмари Аскандаровлул чIивиния­цIасса хиял бивкIшиву цала бу­ттал шяравун Кьукнив ламу бан­сса. Бугьарасса шяраваллил хъами кIусса гьивурдащал нех лахъла­хъисса ккавккун, ганал оьрчIнийва цахьхьунма цала махъ буллуну бур хъуна хьувкун ва кIанттай ламу банна куну. «Хияллу гьарцаннал бикIайссар, амма нажагьссаннал­сса бакъа барткъалагайссар. Оьмари МахIаммадовичлуллив хъунма­сса захIмат бивхьуссар цала хиял дузрайн букканшиврул», — увкуна Ссалам Хавчаевлул.
Оьмари Аскандаров ххаллил­сса давурттайну дакIнийн утлатисса ихтилатру ялагу бувна Ссапар Аьбдуллаевлул, Сулайман Мусаевлул, Иосиф Ссунгъуровлул.
Цинявппа кIицI лаглай бия, цала пишалул лавайсса усттар ушивруцIун, Оьмари Аскандаров ивкIшиву пасихIсса мукъуйну цала пикри бусан бюхъайсса даражалул шаэр, чичу ва журналист. Республикалул личIи-личIисса кказитирттай дуккайсса диркIшиву Дагъусттаннал ххуллурдая бусласисса ванал макьалартту.
Оьмари Аскандаровлул арснал МахIаммадлул бусласимунийн бувну, ванал щала оьрму хас бувну бур ххуллурдан. Кулпатранссагума чIун диял къашайва тIий ур ва. Буттал аьпа буруччинсса даврихлу барчаллагь увкуна Загьид Хучбаровлухь ва Лакрал райондалул каялувчитурахь.