Волгоград шагьрулул Тракторозаводской райондалул 61-мур школалий тIиртIунни ларгсса шинал хасъсса аьралий операциялий Ватандалул мурадру буруччаврил ххуллий чувшиврий жан дуллусса Айдаев Руслан Заругиннул арснал аьпа абад буллалисса ула. Мероприятиялиясса сюжет ккаккан дунни «Россия 1» каналданий.
Русланнул жан дуллуссар 2023-ку шинал Донецкаллал областьрайсса Марьинка тIисса шяравалу тархъан дуллалисса ца талатавриву аьралий гьалмахчу ххассал уллай.
Руслан увссар Небит-Даг тIисса Туркманнал шагьрулий Хъусращиял шяравасса Заругиннул ва Залмул кулпатраву.
Шикку ванал ппу къуллугъ буллай ивкIссар СССР-данул аьралий гьавалул гужирдаву. Союз ппив шайхту, Айдаевхъал кулпат бивзссар Волгоград шагьрулийн. Руслангу цала уссурвавращал хъуна хьуссар Шагьру-виричулий.
Волгоградрайсса паччахIлугърал технический университет къуртал бувну махъ зий ивкIссар цала пишалий. 2022-ку шинал, билаятрай мобилизация баян байхту, цалчинминнавух лавгссар СВО-лийн.
Ва школалий Руслан Айдаев дуклай ивкIун ур ххюйлчинмур классрая тIайла хьуну, къуртал банцIа, 2008-ку шинайннин.
Тания махъ ва школалул итаавкьуну ур цимиягу ттурша выпускник, амма гиччава кьянкьасса хасият дусса оьрчI учительтуран дакIний ливчIун ур хIакьинунингу.
– Ххюйлчинмур классраву ттучIан увкIуна хъунисса исвагьисса лухIисса яруннищалсса, чурххал лахъ акъасса оьрчI. Ганан гьарзатрах гъира бикIайва. Га ия дусшиву дангу, дуруччингу кIулсса вихшаласса оьрчI. ОьрчIру ганал лагма лавгун бикIайва. ЧIивисса ухьурчагу, ганал хIурмат бикIайва лавайми классирттал дуклаки оьрчIачIагума. Гиччава чIалай ия ичIаллил тарбиягу ххуйсса, хасиятралгу кьянкьасса усса, – дакIнин утлай бур ингилис мазрал учитель Ольга Балакина.
Нитти-буттал ва учительтурал бусаврийн бувну, Руслан ивкIун ур гьарзатрал ка хъирив- ларсса: дуккавриву хIарачат бусса, компьютердаву зат бувчIайсса, спортраву итххявхсса. МуницIун инсаншиврул хасиятругу ххуйсса – тIайламур ччисса, дакI цIуцIисса. Вай хасиятру ядурну дур цала бусса оьрмулий.
Ватандалул ялун нигьачIаву дирсса чIумал, пикри къабувну, лавгун ур паччахIлугърал мурадру буруччаврил ххуллий талан.
– Ттул дакIнивусса къюву цуксса куртIсса ва захIматсса духьурчагу, ттул арснал тIайласса хIукму бувссар, цанчирча ватангу ниттил ххуллийссар, ватандалул мурадру буруччаврил ххуллий жан дулаву нину дуруччаврил ххуллийссар. Янил тарг къакуну ххявххуна тIар дуснал ялун нанисса гранаталул хьхьичIун. Инсаннан къакIулссар цавура цуксса къучагъшиву, чувшиву дуссарив. Хьуннав ттул арснал дурсса чувшиву хъирив нанисса никиран эбратну, – увкунни Русланнул буттал Заругиннул.
– Жагьилтал – жула бучIантIимурди. Миннал тарбиялухсса жулла къулагъасгу дикIан багьлай бур хъуннасса, хаснура ватан ххирану тарбия баврих. Жула дусса язимур хъус – му Ватанни, – ххи бунни виричувнал буттал.
– Жул школалий хъуннасса къулагъас дуссар ялун нанисса ник Ватан ххирану тарбия даврил чулухуннай. Му жул буржри. Жул школалий буссар музей «Воинской славы», чIярусса дайссар дуклаки оьрчIру Ватан ххирану тарбия баврил ххуллийсса мероприятияртту. Вагу мунил ххуллийссар. ОьрчIру ванийн гъирарай хIадур хъанай буссия. Виричунал аьпа вайннал дакIурдиву личIантIиссар, – увкунни школалул директор Татьяна Шумилинал.
Зулайхат Тахакьаева
