Хасъсса аьралий операциялул ляличIишиву му дур, ванил цачIун бунни, лагма лаган бунни илкинсса, дазу-зума дакъасса Аьрасатнал билаятрал щалагу агьлу. ЧIивиная хъунанайн бияннин, гьарицама ур цащава шаймур буллай, Украиннал нацистътурал ва миннал чул бувгьуминнал режимгу ххит дурну, ххувшаву гъан дан.
Лапва жагьилсса, чаннаннил дакIру дусса жула оьрчIру хушрай най бур аьрайн. ХьхьичI ххуттай бавцIуну, гьарицама ур цащава шаймур буллай. Ца ур БМП-лул штурвалданух щяивкIун, вама ур, СВД-лувух ишан ларсун, аьщуйн щунну битлай, ца ур окопру дуклай, дахIаву дяличIан къаритлай, тама тIурча, пулеметрал тIиртIусса цIаравух аьралий дустурал щавурду дахIлай.
На бусанна зухь жагьилсса хьхьирил ахьттачу, жула ватанлув Бурхаев Абакардуя – позывной «Каспий».
Абакар ур Ккуллал райондалийсса Ккуллал шяраву. Ва хушрай увкIун ур аьралий операциялийн.
Медициналул кIулшивуртту ларсъсса Абакардул мурад бур инсантал ххассал баву.
Медициналул зузалал кумагрив яла аьркин багьлай бур бахьттагьалтран. Мунийн бувну, ванал язи бувгьуну бур «Каспий» батальон. Хьхьирил бахьттагьалтрал 177-мур гвардиялул полк ккаллиссар аьралуннал подразделениярттал элиталун ва мудан талатавурттал хьхьичI ххуттай буссар.
Шикку ишла дуллай ур цала кIулшивуртту ва бюхъу жула Абакаргу.
– Абакар, нигьачIий акъарав, дяъви бур дяъви? – цIухлай ура ванахь.
– Ттун хъинну ччай бур жула оьрчIан кумаг бан, му гьавас нигьаяр ялтту буклай бур, – тIий ур Абакар.
– Ниттин къаччай бухьунссияхха, ци увкуна мунил ина аьрайн тIайла уклай?
– Арс, кумаг бува инсантуран, – тIий дия.
Цаманал оьрму
ххассал бан ччишиву – мугу чумартшиврул
ца лишанни.
Цумур ниттинни арс дяъвилийн гьан ан ччисса. Яругу мукьал бяххан бувну, тIайла уклай диркIун дур ччяни хъуна хьусса арс аьрайн Абакардул нину. КIия арс цилалу ччаннай ацIан увсса, тарбия увсса ниттин, гьай-гьай, бигьану къабивкIун бур, амма ватандалийн кьини дурксса чIумал махъаллил къавхьусса арсная пахрулий диркIун дур.
– Медициналул зузалан ци нигьачIаву духра, – учин бюхъайссар иш-тагьар къакIулнал. ЧIявуминнан къакIулссар дяъвилул майданнив медициналул зузалан ахьттачувнаннияр чансса дакъашиву нигьачIаву. Бахьттагьалтрал кIунттихь автомат бухьурча, медициналул зузалал ярагъ бур бинтру ва жгутру. Цаннал бат уллай ухьурча душман, вама цала оьрмулун нигьачIаву дусса тагьарданий буккан буллай уссар щавурду дирми дяъвилул майданния.
Солдатнаща,цахъи хIаллайсса бунугу, лаикIан бюхълай бухьурча, медикнан цукунчIав хIурхIа хьун бучIину бакъар, ванал бюхъу-хъитлийн хъар хъанай бур щаву дирманал оьрму.
Цаманал оьрму ххассал бан ччишиву – мугу чумартшиврул ца лишанни. Му дур оьруснал халкьуннал агьаммур хасият, виваллил аслу. Мяърипатрал, ас-намусрал чулуха жула аьрал цукссагу душманнаяр ялтту буклакисса бур.
Щак бакъар, жува ххув хьунтIиссару!
Жамалуттин Амирханов,
позывной «Илчи»
ХIадур бувссар
Андриана Аьбдуллаевал
