Вай гьантрай Республикалул Госавтоинспекциялул къатраву хьунни дачIи шинал мутталийсса даврил хIасиллу дуллалисса батIаву. Дагъусттан Республикалийсса ГИБДД МВД-лул Управлениялул хъунама, полициялул полковник Александр Шалагиннул журналистътурахь бувсунни, машинарттал ххуллурдай апатIру хьун къабитаву мурадрай циксса давуртту дулларчангу, республикалий 773 ДТП хьушиву, миннуву 146 инсан оьрмулуцIа ва 112 инсан личIи-личIисса цIунцIияртту хьусса бушиву.
Ларгсса шинал вара чIумущал архIал бивхьуну ххал барча 6.5 % ххишаласса ДТП-тту хьуну дур.
Аьрасатнал 38 региондалува Дагъусттан ва Москав бур авариярттаву чIявусса инсантал ливтIусса сияхIрал 7-мур ххуттай.
Республикалий машинарттал ххуллурдай 107 авария хьуну дур 16 шинавун бияннинсса оьрчIру бусса. Миннува 12 оьрчI оьрмулуцIа хьуну бур ва 124-ннан личIи-личIисса цIунцIияртту хьуну дур.
Управлениялул аналитический группалул дурсса ахттаршиннарайн бувну, чIярусса ДТП-ртту дур машинартту куннийн кув щуну хьусса, вайннуву ивкIуну ур 87 инсан, ххуллийх нанийни машинартту щуну ивкIуну ур 19 инсан. ДТП-рттал 4,5% бур хIан хIарчIун щупир рульданух щяикIаву сававну хьусса.
Цала ихтилатраву Александр Шалагиннул кIицI лавгуна, махъсса 2 шинал лажиндарай Дагъусттаннай федерал ххуллурдай ДТП-ртту гьарза хъанай душиву. Вай ххуллурдай ливтIушиву чIявуми инсантал.
Ведомствалул каялувчинал бусаврийн бувну, МахIачкъалаливгу шиная шинайн чIяву хъанай бур аварияртту хьуну оьрмурдацIа хьусса инсантал.
– Июнь зуруй хьусса ДТП-рттаву ивкIусса 23 инсаннава 8 ур федерал ххуллурдай оьрмурдацIа хьусса. Александр Шалагин личIинува авцIуна оьрчIру хIалану хьусса авариярттай. КIицI лавгуна оьрчIру ливтIусса ва вайннан цIунцIияртту хьусса ишру тикрал хъанайнма бушиву.
Ахирданий ведомствалул хъунаманал жавабру дуллуна журналистътурал суаллахьхьун ва барчаллагь увкуна Госавтоинспекциялул даврия агьалинахь бусласисса СМИ-рдал зузалтрахь.
Региондалул Госавтоинспекция цинявппагу инсантурая тIалав дуллай бур машинарттал ххуллурдайсса низам дуруччаврил ялув кьянкьану бацIаву.
Имара Саидова
