Дунияллий хъиншиврул чулуха цинявцакуцну лявхъуну бакъар, цавайннайнхъиншиврул бутIа сахаватну бивну бикIай, цайминнайннив чанну. Цавайхъуни-хъунисса хъинбалартту булланччисса бикIай, ваймирив – бувагукъаччисса. Амма, дакI дарцIуну бура, оьрчIаву хъиншиврул гьанна оьрчIнийва цIакьну бугьарча, хъиншивуртту дуллан лахьхьин буван, кIива мукъуйну учин, хъиншиву тарбия дуван шайшиврий.
«Хъинсса давурттал луттирал» автор, ттулшяравучув МухIаммад Юнусовгу дакI дарцIунуур, оьрчIру ва нитти-ппу хъинмур булланкIункIу бувансса стимулну хьушиврий кIицIлавгсса лу. КутIану ва луттирая бусан, ва бургьарца кьини буцIин буван аьркинсса дневниккунмасса лур, оьрчIал гьарца кьини цалладурсса хъинсса даврия чичлачисса. Му ци журалул хъиншиву духьурчагу, щин дурсса духьурчагу. ЧIирисса, хъунсса, личIи дакъа. ИчIуванан дикIу, чин дикIу. «РувхIанийшиву» тIисса разделданий даиман маркIачIанмай чичлачиссар оьрчIал цалла дурмур, данна тIий бунува дуван къархьумур, циван, ци багьана хьуну къадурссарив ва гьунттий дуван дакIниймур. Гьарца зурул ахирданий «Хъинсса давурттал балансрал нигь» тIисса бутIа буцIин буллай, оьрчIал зуруй дурмунил хIасиллу дуллалиссар, бусласиссар, цайминнан хъинбала баврийну ци дурххуссарив, цукунсса асарду буссарив. Ва луттирал мюнпат бувчIунутIалав буллай, ялу-ялун машгьур хъанай бур республикалул кьатIув, цайми регионнай, билаятирттай. – Жува дан-дитанмунил планну дуллан бикIару, «Хъинсса давурттал лу» жува гьарца кьини хъиншиву дуллали буллансса кумагчири. МаслихIат буллай ура ва лу ишла буллан, Кьиямасса кьинилийнсса луртан хъун дуваншиврул», – тIий ур динчи МухIаммадрасул Саадуев. «ЛяРиба» финансирдал къатлул директор Мурад Алискеровгу укун тIий ур луттирал хIакъираву: «ТIайламур бусан, ххари унна на ва луттирал. ЦичIав аьламат, караматсса лу бакъар, инсан ишла буллай ур, амма, луттирал мюнпат хъунмасса бур, луттирал залуннан цанмагу, луттирал залуннал хъиншиву дурманангу».
Къазаннай хьусса Аьрасатнал Жяматийсса палаталул заседаниялийгу лахъсса кьимат бивщуну бур МухIаммад Юнусовлул проектран. Ва палаталул член,физкультуралул ва цIуллушиврул масъалартталсса буллалисса комиссиялул хъунаманал хъиривчув профессор Е. А. Истягина-Елисеевагу маслихIат буллай бур, кIулшивуртту дуллалисса идарарттай ва спортрал учреждениярттай, чара бакъа оьрчIру ва лу ишла буллали буван, хъиншиву-хъинбала буллан оьвтIисса бушивруцIун, ялун нанисса ник кулпатрал, билаятрал, аьдатрайсса ххазинарттал хIурмат буну къуццу тIунгу лахьхьин буллалисса бунутIий. Бусанна ва проектрал презентация хьушиву Стамбуллай, бусурманнал бизнес форумрай, Ингушетиянаву, тайннал экономикалул министрнал хъиривчув Аслан Нальгиев ва национал политикалул министрнал хъиривчувРуслан Мизиев ва цаймигу къуллугъчитал гьурттусса батIаврий. Мукунна Каспийскаливсса Хьхьирил кадетътурал школа-интернатрай. Лу кьатIаллил билаятирттал цаппара мазурдийгу итабавкьуну бур: ингилиснал, туркнал, аьрабнал мазурдий. МухIаммад буслай ур хаснува хъуннасса къулагъас душиву Аьрабнал билаятирттай. «Ва луттирал мюнпат бувчIуну, МоскавливдукIу хьусса «Исламрал бизнесраву хIалал инвестициярду» тIисса Дунияллул халкьуннал дянивсса форумрай Консалтинграл центрданул гендиректор, щайх Исмяил Десаил маслихIат бувна, лу кьатIаллил билаятирттал мазурдийгу итабакьин. Луттирал цалчинми чIапIай Кьурандалувасса сурарду буссар, оьрчIан исламгу лахьхьин дуваву мурадрай, ниттил мазругу ишла бувансса ца чаран хIисаврай, яру ва къумукь мазурдийн таржума буллай буссар. Лакку мазрайнгу таржума бувну итабакьинсса пикри бур, луттирал спонсоршиву дуванма уккарча. Лаккуйсса школардайсса оьрчIайх бачIин хьунссия. Машан ласун ччисса угьурчагу луттирал багьа лахъсса бакъассар, оьрчIансса ссайгъатри, –тIий ур МухIаммад. Ванал увкумуницIун бавкьуну, ххи буванна: Зумаритавал байрандалул гьантрай оьрчIан пишкаш буванма ссал къабагьар? ДакI дарцIуну бура, лу мудангу хъинсса бахшиш душиврий. Хаснува хъиншиврул, хъинбалдарал ххуллийн оьвтIимур, ххуймур, хъинмур ххуй бизан буллалимур.
ПатIимат Рамазанова
