ЦIанасса заманнай жунна цинявннан оьрчIнияра ххира хьусса Хъурдаккаврил байрандалул гьанулулмур мяъна-мурад баххана хьуну, бухлавгун бунугу, буттахъал заманнай кунма, тяхъашивуртту ва хъярч-махсаралийсса бяст-ччаллу бан гьар кIаная мюрщи-хъуни шяравун бувкIун, жямат цачIун баймур, гъан баймур мяънарив яхьуну дур.

ХьхьичIра жулла щархъаву инт дуркIун, тIабиаьт чантI учаврищал дайсса диркIхьурча къурнил байран, цIана дуллай бур гъилишиву дагьну, гьавалий диялну чIун гьан дан бю­хъайсса апрель зуруй. Буттахъал заманная шиннай зунттавусса лакрал щархъаву кунна ва байран ххирассар ва циняр аьдатругу дурурччуну тIайла дуккайссар ччянияцIава арив миналул хьусса КIамахъаллал, ГьунчIукьатIрал, КIундиннал ва цаймигу лакрал шяраваллувугу. Байран дайдишин хьхьичI гьантрайсса хIадуршиннаралгу шяраваллавун цин лархьхьусса цирив ца тIааьншиву рутай. Арамтал – хъарасралсса буллай, хъами, цачIун хьуну, нахIу бартри шахьлай, дукьрахIанттилсса буллай. Вай цимурцаннух ялугьисса оьрчIалмур ххаришиврия буслайвагу бакъара!

Вана вай бигьалагай гьантрай хъуннасса ххаришиву ва уттарашинна дия Бабаюртуллал райондалийсса КIамахъаллал ва Ппалассуннал жяматру яхъанахъисса Сангардал шяравугу. Ковидрал карантин баян бувсса шиная шийннай, сайки 4 шинъя шикку, ялагу личIи-личIисса багьантту хьхьичIун багьлай, Хъурдаккаврил байран дансса сант къадагьлай.

Вайксса шиннардий Хъун хъузалал бурж бивхьуну ивкIсса ЦIаххаев Маликлул мурадгу бия, цIунилгу жямат бавтIун, буттал буттахъал аьдат цIу лаган дурну, щарнил кьуру гихунмай бачин бансса.
КIюрххила хъузалал хIаят­раву дикI шахьлахьисса хъуни кIункIурду ва  пулав бан­сса къазанну бивзун, дара тIаннул пуркIурал ва нахIу дукрардал кьункьал ларсун най дия. Щарнил клубрал хьхьичIун батIлатIисса хъамаллурал кьюкьагу лахъи дуклай дия. Цимурцаннуя ххарисса мюрщултрал аьлагъужагу цалнияр ца ххи хъанай, гурсса уттарашинна дия.

УчIайма увкIун, циняв цачIун шайхту, щарнил хъунисриннал баян бувна, хъув буккан чIун хьушиву. Аьдатрайн бувну: «Хъу дюхъаннав, тта бюхъаннав, хъуния, ризкьилия дуркIмур дукан­сса цIуллушиву дулуннав», – куну, дуаьрдугу дурну, байрандалул дайдихьу дуруна оьрчIи-кIури дурсса хъарасрай щяивкIсса Хъун хъузалал ва ганайх аьрщарал кIама бищун ххарил левчуну нанисса щарнил оьрчIал. Гайннаяр махъун багьлай бакъая жагьилтал ва бугьарами. Хъарас щуну, гьанна бивщуну махъ байбивхьуна бартри духхинсса лечаврил бяст-ччаллу ва жагьилтуран ххирасса спортралмур бутIа. Бяст-ччаллал ахир дуруна дучри ххяххан баврийну. Шикку цалчинмур кIану бувгьуна чIаххуврайсса Ново-Кара тIисса даргиял шяравасса гьурттучинал чал.

Гихуннаймур щябикIаву хьуна шяраваллил клубраву. Мажлис бачин бувну ия Сангардал шяравусса хIурматрайсса хъунмур никираясса Муртузааьлиев Муртузааьлил.
ЦIаххаев Маликлул, жяматрахь ва хъамаллурахь барчаллагьгу куну, ихтияр ларсуна кьуру тапшур бан. ДукьрахIанттил бувцIусса кьурттарава щарнил арамтурал нахIала бувну махъ, баян бувна Хъун хъузалал бигар тапшур буллай ушиву цала шяравачу Аьбдуллаев Саэдлуйн. Вай кIиягу ризкьи-кьинилуха зузисса, колхозирттал заманнай Лаккуя арив гьан бувсса, хъунмасса захIмат бивхьусса нитти-буттал арсрури.

Цинявннахьхьун цIуллушиву дулуннав, захIматрая нигьакъабувсун цала маэшатгу буллай, буттал буттахъал аьдатругу дурурччуну, укун жямат цачIун буллансса!

Залму АьбдурахIманова