Вай гьантрай Лакрал театрдануву хьунни ЦIуссалакрал Маданиятрал къатлул зузалтрал ва художестволул самодеятельностьрал коллективрал хIадур дурсса ЦIуссалакрал райондалул администрациялул чIарав бацIаврийнусса ихIсандалул концерт. Концерт сакин дурну дия августрал 14-нний ЦIуссаккуллал шяраваллия арх бакъасса кIанттай пIякь учаву сававну ливтIусса ва бивщусса инсантурал кулпатирттансса кумаграл ххуллий.
Концертрал мажлис бачин бувну ия Дагъусттаннал халкьуннал лайкь хьусса артист Шамсуттин Къапланов. Зал щапI куну буцIаврийну исват хъанай бия жула инсантал та ишираву оьзрурду хьусса инсантуран кумаг бан хIадурну бушиву.
ЦIуссалакрал Культуралул къатлул зузалтрал коллектив, балайчитал, артистътал гьар мудангу тIалавну ва бусравну бикIай тамашачитуран. Ххаллилсса концертрал программалийну вайннал цал уттигу ххари бунни цахва мякьну бивкIсса тамашачитал. Вайннан бахшишну хьунни Таибат Къаллаевал, Сара ХIажиевал, ХIабибат МахIаммадовал, Роза Аьлиевал, Аьйша Жабраиловал, Написат Аьлисултановал, Родна ХIасановал, Заира Давыдовал балайрду. Мукунма вичIи дирхьуминнавун гьавас бутансса, балайрду увкунни Арслан Шагьмардановлул, МахIаммад Аьлиевлул, Аслан Муслимовлул ва Рафик Сулаймановлул. Авадансса дия концертрал программа.
ИхIсандалул концертрал сий гьаз дунни Дагъусттаннал миллатирттал балайчитал Зульфия Илиясовал, Ххадижат Жамалуттиновал, Апанни МахIаммадовлул, Машидат ОьмарасхIабовал ва Руслан ХIасановлул.
Аслийсса лакку макьандалий ХIабибат Буттаевал балайлухун «Дараччи» фольклорданул коллективрал ккаккан дурсса къавтIавугу хъинну асар хьунсса дия.
Ххуйъя, ххаллилъя ЦIуссалакрал артистътурал Зайпуллаев Расуллул, Шамсуттин Къаплановлул ккаккан бувсса цIу бусса къямадияртту.
Ва кьинисса концертрай «Дараччи» ихIсандалул фондрал президент Гульшан Хасаевал ХIабибат Буттаевайн тапшур дунни фондрал чулуха апатIру хьуминнан кумагран дартIсса арцугу.
Цинявппагу гьурттучитурахь ва чIарав бавцIуминнахь барчаллагь увкунни ЦIуссалакрал райондалул бакIчинал хъиривчув Арсен Гъазиевлул. «ЦIуссалакрал райондалул бакIчинал бувсса хIукмулийн бувну сакин дурну дуссар ЦIуссаккуллал шяраваллил арх бакъа хьусса оьзрулухьхьун биривминнан кумагрансса резерврал фонд. Ва концертрай хьусса арцугу дичинтIиссар фондравун. ДакIнийхтуну барчаллагь тIий ура ва ххаллилсса давривух гьуртту хьусса ва чIарав бавцIусса инсантурахь», – увкунни ванал.
Мукунма цинявннахь барчаллагь увкунни ХIабибат Буттаевал.
«Райондалул жяматрал чулуха барчаллагь учин ччай бура гьарцагу жу дуллалисса мероприятиярттал чIарав бацIайсса Лакрал театрданул директор Бадрижат МахIаммадхIажиевахь ва зузалтрахь, «Дараччи» клубрал президент Гульшан Хасаевахь, ЦIуминалийсса азарханалул хъунмур хIакин Булбул ХIасановахь, ЦIуссалакрал КIулшивуртту дулаврил управлениелул хъунмур Светлана Рамазановнахь, ЦIуссаккуллал 2-мур школалул директор Татьяна Айгуновахь, Дагъусттаннал филармониялул директорнал хъиривмур София Разуевахь, «Илчи» кказитрал журналистътурахь, «Аьрщи ва агьлу» передачалул редактор Карина Далиевахь. Гихуннайсса жула хьунабакьавуртту, дуниялгу паракьат хьуну, жунгу балай учин ччай, зунгу вичIи дишин ччисса хьунссар тIисса умуд бур», – увкунни Буттаевал.
Имара Саидова
