Сентябрь зурул 17-нний Избербаш шагьрулий байбивхьунни «Каспий-
2023» тIисса Ухссавнил Ккавкказуллал жагьилтурал кIулшивуртту
дулаврил форум.

Форумрал даву дур ххюва гьантлул мутталийсса ва
къуртал хьунтIий дур сентябрь зурул 20-нний. Шикку гьуртту хьунни
щалагу билаятраясса дуккавриву, давриву хьхьичIун ливчусса
жагьилтал. Гьашинусса форумрай мукунма гьуртту хьунни 14-17-лла
шинавун бияннинсса оьрмулул оьрчIру ва душру.
Мукунма, форумрай лекцияртту буккин, мастер-классру, конкурсру
бан бувкIун бия яла цIанихми экспертътал. Форум наниссаксса хIаллай
ккаккан дуллай бия авадансса концертрал программа.
Гьашинусса форумрай яла агьаммур дия добровольчествалул тема.
Шикку, мукунма сукку бунни медиасфералул, туризмалул ва аьрали-
патриот тарбия дулаврил масъалартту.
Форумрал давриву гьуртту хьунни щалагу билаятраясса ва гъансса
чил билаятирттаясса 600-нния ливчусса инсантал. ЛичIинува кIицI
лаган, форумрай чялишну гьурттушинна дуллалиминнавасса бия
Аьрасатнал цIусса аьрщараясса жагьилтал. Хаснува, вайннан
хьхьичIунну дия добровольчествалул ва кувннал кув чIарав бацIаврил
темарду.
Аьдатравун багьсса куццуй, форумрал гьурттучитурал
презентацияртту дунни грантирдал лагрулий дурсса проектирдал.
ХьхьичIунсса кIанттурду лайкь бувсса проектирдан дулунтIий дур
Аьрасатнал жагьилтурал чулухасса харжлугъ.
Форумрай хьусса дахханашивуртту кIицI лаглай, бусан ччай бура,
гьашину цалчин тIивтIуну бивкIшиву «Движение первых» тIисса
суккушиннарал гьурттучитурансса площадка.
Форумрал даврил лагрулий жагьилтуращал хьунавкьунни ва миннал
суаллахьхьун жавабру дуллунни Аьрасатнал спортрал лайкь хьусса
мастер, фигурный катаниелул машгьурсса тренер, фигурист,
продюсер Илья Авербух.
Ванал бувсунни спортрал ххуллийсса карьералия, ккаккан дунни цала
оьрмулия бусласисса ва оьрчIан насихIатруну хъанахъисса
видеоролик.
Форумрал даврил лагрулий жагьилтуращал хьунабавкьунни
«Скорпион – Каспий» тIисса ДР-лийсса Росгвардиялул
управлениялул ОМОН-далул командир, полициялул полковник
Валерий Ларюшкин бакIчийсса зузалт. Росгвардиялул зузалтрал
форумрал гьурттучирахь бувсунни, ведомствалул хьхьичI бивхьусса
аьрали бигардая.
Жагьилтуращал хьунаавкьунни ДГУ-рал элмулул ва цIушиннардал
даврил проректор Муртазааьли Рабаданов. Ванал цала ихтилатраву
кIицI лавгунни кIулшивуртту дулаврил аралуву хьусса цIушиннардая,
бувсунни жагьилтал элмулухун ва волонтертурал иширттавух хIала
буххан бувансса чаранну.

Имара Саидова