Дагъусттаннал ХIукуматрал председатель Рамазан ЖахIпаров­лул дунни Буйнакскалий шагьрулун ва райондалун гъарая ва микI бичаврия бивсса зараллу лахъаврил хIакъиравусса совещание.

Шикку гьуртту хьунни ДР-лул граждан обороналул ва ЧС-рал министрнал хъиривчув Эльдар Атаев, Буйнакск шагьрулул бакIчинан кIанайсса Шамил Исяев, Буйнакскаллал райондалул бакIчи Уллубий Ханмурзаев ва цаймигу.

Совещание тIитIлай, Рамазан ЖахIпаровлул бувсунни ванил мурад бушиву чIярусса гъараллая ва бивчусса микIирая Буйнакск шагьрулун ва Буйнакскаллал райондалийсса цаппара шяраваллан бивсса зараллу лахъаврил хIакъиравусса Да­гъусттаннал БакIчи Сергей Меликовлул хIукму щаллу баврил, мукунма хьусса зарал исват буллалисса документру щаллу баврил масъалартту ххал бигьаву.

Цала ихтилатраву Эльдар Атаевлул кIицI лавгунни, чIяву квартирарду бусса ва цивппа заллусса къатран бакъассагу, хъунмасса зарал социал сфералул объектирдангу бившиву.
– Республикалул МЧС-рал 30-ксса зузала мудан дахIаву дуну уссар ва тагьарданул хIакъиравусса комиссиялул вакилтуращал, шагьрулул ва райондалул хъуниминнащал. Вайннал кабакьу буллай бур зарал бивминнан кумаг бансса документру хIадур бавриву, – увкунни ванал.
Шамил Исяевлул бувсунни хIакьинусса кьини гъараллая зарал бивсса агьалиная 4807 аьрза бушиву.
– Вай циняв ххал бивгьуну, хьусса заралданиясса актру щаллу дурну дуссар. Амма чIявуми заллухърунначIа бакъар къатрал аьркинсса документру, – увкунни ванал.
Ихтилатру къуртал хьуну махъ Рамазан ЖахIпаровлул барчаллагь увкунни Буйнакск шагьрулул ва Буйнакскаллал райондалул хъуниминнахь, мукунма Граждан обороналул ва ЧС-рал министерстволул вакилтурахь дурсса даврихлу.

«Тагьар захIматсса дур. Ва масъалалул ялув авцIуну уссар цува Сергей Меликов. ХIакьинусса кьининин хъунна­сса даву дурссар. Гьарица къатлувун бивну, тагьар ххал дурну, яла зарал бивминнан ва ахIвал кIюласса кулпатирттан кумаг бувссар. Уттиния тихуннай данмургу чансса да­къар. Шагьрулул ва райондалул бакIчитуран ччяни щаллу бан аьркинну бур Дагъусттаннал ХIукуматрал резерврал фондрая вайксса-тайксса арцуйнусса кумаг бан багьлагьишиву исват буллали­сса документру, чIумуй хIадур дан багьлай бур магъив дишин багьлагьисса кулпатирттал сияхIру, луртаннал резерврава итадакьлакьисса шифер дачIиншиврул», – увкунни Рамазан ЖахIпаровлул.
Хъирив, цаппара масъалар­тту Республикалул КIулшивуртту дулаврил, ЗахIматрал, Шяраваллил хозяйстволул министерствар­ттайн тапшургу бувну, ми ща­ллу бансса чIун ккаккан дунни.