Абакардул душ Мудунова Гьидаят
Оьрмулул 75 шинаву, захIматсса цIуцIаврища ххассал къавхьуну, аьпалухьхьун лавгунни ГьунчIукьатIрал шяравасса Абакардул душ Мудунова Гьидаят.
Бувну бур Гьидаят фронтовик, чичу Абакар Мудуновлул кулпатраву. Буттал шяраву школагу къуртал бувну, бувххун бур Дагъусттаннал университетрал филологиялул факультетрайн. Университетгу бувккуну, дурурччуну дур филологиялул элмурдал кандидатнал диссертация, зун бивкIун бур филологиялул факультетрай дарсру дихьлай.
Студентътурал дянив хъинну бусраврай буссия Гьидаят. Вайннащал архIал лагайссия шяраваллавух, фольклор, шеърирду, аьдат-эбадатру ахттар дуллан. Гьарца студентнал дакIнивунсса ххуллу лякъайва Гьидаятлул.
АрхIал зий бивкIминнан ва цилла дарс дирхьуминнан Гьидаят дакIний личIантIиссар гьунар ххисса педагог-пишакарну, хъунанащалгу, чIивинащалгу маз лякъин кIулну, оьрмулул кьадру-кьимат буну къуццу тIий бивкIсса ххаллилсса инсанну. Хаснува ванил студентътуран ва дакIний личIантIиссар гьарца ишираву цала чIарав бацIлай бивкIсса, цахлува махъ буслай, аьркинний хъирив буклай бивкIсса хIакьсса учительну. Хъинну цила пиша ххирасса, дуллалимуниву дакI дирхьуну зун кIулсса, вава куццуй цила студентъталгу тарбия буллалисса бикIайва ва.
Гьидаят Абакаровна филологиялул факультетрал ттарцIну бикIайссия. Пишлищал бакъа студентътурачIан гъан къашайссия, хасну укун дакIнийгу личIантIиссар ва чIярусса шиннардий цилла дарс дирхьуминнан.
Гьидаят буссия дакI-аьмал хъинсса, ихтилат аьчухсса, гьарцаннащал хIал бавкьусса, ка-кумаг буван, чIарав бацIан хIадурсса, уздансса хъамитайпа.
Гьидаятлул буттал, дяъвилул гьурттучи, шаэр, чичу Абакар Мудуновлул жулла литературалуву багьа бищун къашайсса ххазина кьабивтссар. Хъунмасса захIмат бивхьуссар ванил му ххазина, ягу бувну, бугу бурувччуну, хъирив нанисса никирайн тапшур баншиврул.
Гьидаят дунияллия лагаврил кьурчIишиву кIидачIлай, жижара буллай буру ванил душнихь ПатIимахь, ссурваврахь Шагьрузатлухь ва Луизахь, махъсса щалагу агьлу-авладрахь. Цил гьав нурданул дуцIиннав, бунагьирттал аьпа баннав, рухI бигьаний дишиннав, алжаннул ххари баннав. Амин!
ГьунчIукьатIрал жямат
Чупанов МахIаммад-Расул МахIаммадал арс
Июльданул 6-нний оьрмулул 84 шинаву аьпалухьхьун лавгунни кIулминнал хIурмат лавайсса, шяравуминнан ва дустуран ххирасса, бусравсса адамина, Хьурттал шяравасса Чупанов МахIаммад-Расул МахIаммадал арс.
МахIаммад-Расул увну ур 1939-ку шинал Хьурттал шяраву МахIаммадал ва ПатIиматлул кулпатраву. Ппугу ччяни дунияллияту лавгун, ниттищал ва буттал ниттищал ливчIун ур. ЧIивину унува ниттицIун кумаг буллали хьуну ур МахIаммад-Расулгу. Бюхъаймур буллай, колхозраву зий ивкIун ур. Муния махъ, АьсатIиннал Алагир тIисса шагьрулий ялапар хъанахъисса цала ниттиуссичIан, МахIаммад-СадикьлучIан, лавгун, уссал усттарнал пишагу лавхьхьуну, тикку зий ивкIун ур. Ниттил зана хьу тIий, махъунай шавай увкIун, Ахъушав уссал усттарну зун ивкIун ур. Та чIумал Ахъушиял райондалул хъунама хIакинну зий ивкIссар ванал ссурахъу Вагьабов Щайхмурад. Ца-кIира шин тиккугу дурну, зана хьуну шавай, Гъумук гава цала пишалий зун ивкIссар. Муния махъ, механизаторнал пишагу лавхьхьуну, Хьурттал колхозраву трактористну ва комбайнерну зий уссия. Яла, оьрчIру хъуни хъанан бивкIукун, МахIачкъалалив ивзун, цIунилгу уссал усттарну зий уссия. Муния мукьах, Лаккуй цIусса къатригу дурну, буттал шяравунай зана хьуну, Гъумук зий уссия. Ца дачIи шинал хьхьичIъя даву кьадиртссагу.
МахIаммад-Расул ия дакI марцIсса, аьчухсса, дустуран, кIулцириннан бусравсса инсан. Хьурттал хъатIай ванал ясаулшивугу дайссия. Ва хъинну ххуйну къавтIунгу изайссия, балайгу учайссия, музыкагу бищайссия. Алагирдай ялапар хъанахъисса шиннардий тайннал къавтIаврил ансамбльдануву гьуртту хъанайгу ивкIссар.
МахIаммад-Расул дунияллия лагаврил дакIнийхтунусса кьурчIишивугу кIидачIлай, жижара буллай буру кулпатрахь Зайнаблухь, арсурваврахь, душнихь ва махъсса цинявппагу мачча-гъаннахь. Цал бунагьирттал аьпа баннав, алжаннул ххари аннав, махъ ливчIминнахьхьун цIуллушиву дулуннав!
Хьурттал ва ХьурукIуннал
жяматирттал цIания
Шамил, АьвдуллатIип
Дагъусттаннал паччахIлугърал университетрал филологиялул факультетрал дагъусттаннал мазурдил кафедралул коллектив, хъуннасса кьурчIишивугу кIидачIлай, жижара буллай бур кафедралул доцент Чаллаева ПатIима Шамильевнахь, ванил ххирасса нину
Абакардул душ Мудунова Гьидаят
ахиратрал шаврийн бувну.
Цил бунагьирттал аьпа баннав, алжаннул агьулданувух хьуннав, махънал оьрмурду лахъи баннав!
Дагъусттаннал паччахIлугърал университетрал
дагъусттаннал мазурдил кафедралул коллектив
