Хъиндайдихьу МахIачкъалалив
Май зурул 27-нний МахIач­къала­лив хьунни дунияллул халкьуннал дянивсса Жагьилтурал динийсса форум тIитIлатIисса шадлугъ. Ва ацIилчинсса форумри Дагъусттаннай хъана­хъисса. БавтIцирив барча буллалисса махъ лахълай, Республикалул ХIукуматрал хъунаманал хъиривчу Рамазан Жяъпаровлул дакIнийн бувтуна 2014 шинал ва форум бувансса маслихIат бувшиву МахIачкъалаллал ва Грозныйлул архиепископ Варлаамлул, ва даву Дагъусттаннал ХIукуматрал, Муфтиятрал ва Ягьудинал ккураннал советралгу хъинчулий ккаркшиву ва аьдатравун дагьшиву. Ванал кIицI лавгунни, форумрал личIи-личIисса диннал ва миллатирттал дянивсса дусшиву цIакь дувавриву бутIа бивхьушиву ва шиная шинайн ванил даву магьир хъанай душивугу. Форумрай ихтилатру бувна Дагъусттаннал муфтинал хъиривчу АхIмад МахIаммадовлул, МахIачкъалаллал ва Грозныйлул архиепископ Варлаамлул, ягьудинал ккураннал председатель Валерий Дибияевлул, Татарсттаннал муфти Камил хазрат Самигулиннул, Къалмукьнал буддистътурал ккурандалул объединениялул вице-президент Сергей Киришовлул, Египетнал муфтинал маслихIатчи, щайх Усама Сайид аль-Азхарийл.

Дарбантлив
Хъирив кьини Дарбантлив Нарын-Къалалив дия Дунияллул халкьуннал дянивсса динчитурал конференция «Религия в современном информационном пространстве: национальные и интернациональные аспекты». Ва конференциялул дайдихьу дуллалисса махъ лахълай, республикалул национал политикалул ва диндалул иширттал министр Энрик Муслимовлул, бавтIцирив Дагъусттаннал БакIчи Сергей Меликовлул цIанияту барчагу бувну, кIицI лавгуна конференция Дарбантлив, диндалул ва культуралул ххазинарду ппивгу, цIакьгу хьусса кюрттарай, цивилизациярттал кюрттарай душивугу мяъна дусса иш бушиву. «Ши­кку гьарзат хIала-ккалану дур: тарихийсса, рувхIанийсса мархри ва мяърипатрал гьанурду. Ва шанна диндалул шагьрур. Аьрасатнавун вай динну дуркIссагу Дарбантлияр. Конференция Дарбантлив душавугу ми цимурца жучIара кьиматрай душиврул лишанни», – увкунни Муслимовлул.
Ихтилатру бувсса Дагъусттаннал муфтинал хъиривчу АхIмад МахIаммадовлул, Ливаннаясса хъамаличу, щайх Хилал АхIмад Туркманийл — Триполи шагьрулий­сса Тарабулус мизитрал имамнал, Аль-Мадж исламрал центрданул хъунаманал, динну ва миллатру личIи къабуллай, бавкьуну яхъанахъавриву жунна рахIатшиву душиврул тема гьаз дурна. Иеромонах Григорийл (Матрусов), мубараксса Кьурандалул луттиравасса аятругу дурккуну, кIицI лавгуна жулва цинявннал ца аьмсса тарих ва бучIантIимур бушиву, аьмну цинявгу Заннайн мютIийну яхъанан аьркиншиву. Интернетрал уттизаманнул агьалинайнсса биялалия бувсуна Къалмукьнал буддистътурал вакил, Аьрасатнал Жяматий­сса палаталул вакил Сергей Киришовлул. Луганнал Халкьуннал Республикалул муфти Ильдар Гамбаровлул барчаллагь увкуна фашизм ва неонацизм духлаган дуллали­сса вирттаврахь, бувсуна миннаву чIявусса дагъусттанлувтал бушиву. Вара тема аьч дурна Луганскалиясса архимандрит Макарийл. Ванал бувсуна Магъриб къа­ххуйсса затру ялув духIлай бушиву, миннан ччимур хьун къааьркиншиву. Ихтилатру бувна Дамаскаллал муфти, Исламрал институтрал ректор, доктор, щайх АьбдулпаттахI аль-Бизмлул, Иорданиянавусса Амман университетрал факультетрал декан, щайх, доктор Амжад Рашидлул, Йеменнаясса профессор, шариаьтрал элмурдал доктор щайх Саиб Аьли МухIаммад аль-Асрил.

Педагогикалул университетраву
Форумрал мукьилчинмур кьини кьатIаллил билаятирттаясса ва регионнаясса хъамал хьунабавкьуна властирдал органнал вакилтуращал, вузирдал студентътуращал ва преподавательтуращал. Да­гъусттаннал паччахIлугърал педагогикалул университетравун бивуна щайх, доктор АьбдулпаттахI аль-Бизм, Дамаскаллал муфти, Исламрал институтрал ректор Аль фатх аль ислами (Сирия) ва иеромонах Григорий (Матрусов). Ххачпараснал ва бусурманнал диннал аьлимтурал гьаз бувна, дунияллий хъанахъимуних, оьрмулул иширттах жура-журасса ябитавуртту духьурчагума, инсантал кувннащал кув ссавурданий гъалгъа тIун аьркиншиврул масъала. Иеромонах Григорийл (Матрусов) Кьурандалува­сса аят дурккуна, «Жува Заннал личIи-личIиссану ляхъан бувссагу кувннан кув бувчIланшивруллу» тIисса.
 
Халкьуннал хозяйствалул институтраву
Дагъусттаннал паччахI­лугърал халкьуннал университетравун ивунни шариаьтрал элмурдал доктор, профессор Саиф Аьли МухIаммад Аль-Асри (Йемен). Ва мероприятиялий гьуртту хьунни вузрал ректор АхIмад Бучаевгу. Диндалул вакилтал, аьлимтал, бусравсса щайхтал хьунабавкьунни Дагъусттаннал цайми вузирдаву ва колледжирттаву дуклакисса студентътуращалгу.

Бувгьунни мурхьругу
Шаннагу диндалул вакилтурал уртакьну «Бургъил зума» тIисса оьрчIансса лагерьданий бувгьунни мурхьругу. Национал политикалул ва диндалул иширттал министр Энрик Муслимовлул кIицI лавгунни ва, экологиялул акция хIисаврайсса даву душивруцIун, шаннагу диндалул дусшиву цIакь дуллалисса давугу хъанахъишиву, мурхьру цивппагу оьрму тIутIайх бичаврил, иш бачаврил, бюхъаврил лишан хъанахъишиву.
ПатIимат Рамазанова