Гъази-Гъумучиял щайх Жамалуттиннул агьлу-авладрайн учайсса бивкIун бур Сейд-ХIусайнхъул куну. «Сейд»тIисса аьраб мукъул мяънагу «паччахI», «каялувсса» тIисса мяъна дур. Жамалуттиннуйн цайнмагу учайсса бивкIун бур сейд Жамалуттин-ХIусайн куну. Миннал тухумрал нясав нанисса дур МухIаммад-Идавсил (саллаллагьу аьлайгьи ва ссалам) яла ххирамур душнил ПатIиматлул ва мукьилчинма халипа Аьлил арс ХIусайннуяту.
Цащава бювхъуссаксса гъанну щайх Жамалуттиннущал мачча хьуну ивкIссар имам Шамил. Мунал цанма бувцуну бивкIссар щайх Жамалуттиннул душ Загьидат ва мукунма Шамиллул цалва кIивагу душ, Написат ва ПатIимат, буллуну бивкIссар Жамалуттиннул кIиягу арснан — АьвдурахIманнун ва АьвдурахIиннун. Мунийну Жамалуттин ва Шамил хьуну бивкIун бур ца кулпат кунма.
Шамил ясирну увгьусса чIумал, мунащал архIал, мунал кулпатрал инсантал хIисаврай, АьвдурахIман ва АьвдурахIингу Дагъусттанная Калугалийн бувцуну бивкIун бур. 1866 шинал тикку АьвдурахIманнул кулпат Написат бивкIуну, мунил жаназа диян дан АьвдурахIман махъунай Дагъусттаннайн, Гимрилийн, увкIун ивкIссар. Му чIумал мунащал архIал чIивима уссу АьвдурахIингу, мунал кулпат ПатIиматгу бувкIун бивкIссар. Написатгу бувччуну, АьвдурахIин ва мунал кулпат махъунмай Калугалийн зана хьуну бур. АьвдурахIман тIурча, лавгун ур Ттуплислив, тиккусса та чIумалсса Къапкъазуллал наместник, хъунасса кIинияз Михаил Николаевичлул ихтиярданулун лавсун. Амма лахъи къалавгун мунан миччалу кьабитан багьну бур, мунин сававгу хьуну бивкIссар тIар мунайн хIусудсса цаппара арамтурал буллалисса мазру. Муния махъ АьвдурахIман тIалав уллай бивкIун бур Петербургуллал Императорский университетравун, тикку аьраб мазрал дарсру дихьланшиврул, шинай 1200 къуруш харжиралгу бивхьуну. Ца шинавату дулунну тIий бивкIун бур коллежский асессоршиврул цIагу, майоршиврул чингу.
