ЦIуллушиву дуруччаврил масъалартту хьхьичIххуттай

[dropcap]М[/dropcap]ай зурул 29-нний ДР-лул ХIукуматрал Председатель Аьбдулмуслим Аьбдулмуслимовлул каялувшиндарай хьусса заседаниялий ххал бивгьунни цIуллушиву дуруччаврийн багьайсса цаппарасса масъалартту.

Совещаниялий сукку бунни мюрщисса оьрчIал цIуллушиву дуруччаврил, цIуллу-сагъшиву дуруччавриха зузисса 1-мур звенорал даву цIу дуккан даврил программалул, медициналул идарартту баврил ва цаймигу масъалартту.
Аьбдулмуслим Аьбдулмуслимовлул бувсунни, региондалийсса цаппара медициналул идарарттайн иянсса ва миннул даву ци тагьарданий дуссарив ххал дигьинсса пикрилий ушиву. КIицI лавгунни хьхьичIва-хьхьичI иян ччай ушиву Республикалул онкологиялул центрданийн ва Республикалул клиникалул азарханалийн.
– Дагъусттаннал БакIчи Сергей Меликовлул тапшур бувну бу­ссия цIуллу-сагъшиву дуру­ччаврил ххуллийсса цаппара ма­съалартту, хъирив бивзун, ххал бигьин­. ЦIуллушиву дуруччаврил идарарттал цаппара отраслирдаву диялдакъашивуртту аьл­тту шаврийн бувну, тIалав бувну бия миннул ялув бацIаву дан, – увкунни Аьбдулмуслим Аьбдулмуслимовлул.

Онкологиялул центрданул хIакъираву кIицI лавгунни гьашину шикку зузи дан аьркиншиву радиотерапевтикалуцIун дархIусса уттизаманнул оборудование.
Аьбдулмуслим Аьбдулмус­лимовлул вице-премьер Аьвду­рахIман МахIмудовлуйн ва Да­гъусттаннал цIуллу-сагъшиву дуруччаврил министр Татьяна Беляевайн тапшур бунни республикалий лахъа-хъунсса даражалий дуван демографиялул масъаларттал хIакъиравусса мероприятие.
КIицI лавгсса агьамсса масъаларттавасса цану бия 320 инсаннансса кIантту бусса Республикалул туберкулезрайн къарщи­сса диспансерданул строительство къуртал даврил хIакъиравусса. Объектрал строительство дур лахъи ларгун, му дуллай байбивхьуну бур 2006 шинал.
– ЦIанасса ппурттуву му объект 78 % дузал хьуну бур. Объектрал строительство дайдирхьуния шийннай ванин итадаркьуну дур 1 млрд арцул. Строительствалул ялув бацIавуртту дуллалисса хасъсса органная тIалав буллай ура объект анаварсса мутталий къуртал бансса чаранну лякъаву, – увкунни вице-премьернал.
Совещаниялул хIасиллу дуллай, Аьбдулмуслим Аьбдулмуслимовлул кIицI лавгунни цIуллу-сагъшиву дуруччаврил аралул даврин аьркинсса шартIру дузал даву.
Хъирив махъ лавхъунни Татьяна Беляевал. Ванил балжину бувсунни «Модернизация первичного звена здравоохранения Республики Дагестан» тIисса паччахIлугърал программалул лагрулий дуллалисса мероприятиярттая. Гьашину ва программа дузрайн дуккан даврицIун итадаркьуну дур 1,269 млрд арцул. Май зурул 25-ннийн бияннин дурну дур 1,187 млрд арцун­сса паччахIлугърал кьутIирду. Дузал шавай дур 2 млн арцун­сса кьутIи.
Ахирданий Аьбдулмуслим Аьбдулмуслимовлул дунни цаппара министерствардайнсса ва жаваблувсса органнайнсса тапшурлугъру. Республикалул ЦIуллу-сагъшиву дуруччаврил министерствалийн тапшур дунни 2023 шинал федерал бюджетрава миллатрал проектру дузрайн дуккан даву мурадрай итадаркьусса арцу декабрь зурул 20-ннийн щаллу-ккурккину ишла даву. Дагъусттаннал Строительствалул, архитектуралул ва ЖКХ-лул министерстварттайн тапшур бунни Республикалул туберкулезрайн къарщисса диспансерданул строительство къуртал даврил ялув бацIаву.