[dropcap]М[/dropcap]айрал 30-нний МахIачкъалалив хьунни мушакъатшиву дусса оьрчIал дянивсса «Абилимпикс — 2023» чемпионатрал хIасиллу дуллалисса шадлугърал даражалийсса мажлис.
Шиккува кIицI лаган, «Абилимпикс» чемпионатрал даву духлай дур «Профессионалитет» тIисса Федерал проектравун.
Чемпионатрай хьхьичIунсса кIанттурду бувгьусса пишакартал барча бан бувкIун бия Республикалул личIи-личIисса министерстварттал ва ведомстварттал вакилтал.
«Цинявппагу гьурттучитуран ва хьхьичIунсса кIанттурду бувгьусса пишакартуран чIа тIий бура Аьрасатнаву хьунтIимур чемпионатрайгу тIайлабацIу. ЛичIинува барчаллагь учин ччай бура жагьилсса пишакартал хIадур буллалисса, миннавун пишарду лахьхьин гъира-шавкь рутлатисса жула педагогтурахь», – увкунни ДР-лул дуккаврил ва элмулул министрнал цалчинма хъиривчу Аида ТIалхIатовал.
Хъирив ДР-лул дуккаврил ва элмулул министрнал хъиривчу ХIажимурад МахIаммадовлулгу гихунмайсса бяст-ччаллаву тIайлабацIуртту чIа увкунни.
«Абилимпикс» чемпионатрал суккушинна чялишну хьхьичIуннай най дур. Исват хьунни, цIуллушиврул ссуссукьушиву дусса оьрчIаща, чемпионатрал кумаграйну ччимур пиша язи бувгьуну, зун бюхъайшиву. Махъсса ппурттуву хъуннасса къулагъасрайн ласлай бур укунсса оьрчIру давурттал дузал баврил масъалартту», – увкунни «Абилимпикс» чемпионатрал комитетрал член Наталья Крельдул.
ДакIнийн бутанну, май зурул 25-нния 29-ннийнин МахIачкъалалив, Дарбантлив ва Хасавюртлив най бивкIшиву «Абилимпикс — 2023» чемпионатрал бяст-ччаллу. Вай бяст-ччаллаву гьуртту хьунни республикалул 50-хъул дуккаврил идарарттаясса 136 инсан. Чемпионатрал хIасиллу дуллай, 28 журасса пишалул магьиршиву ккаккан давриву язи увгьунни 84 инсан.
«Абилимпикс» миллатрал чемпионатрал финал хьунтIиссар октябрь зурул 20-23-нний Москавлив «Гостиный двор» тIисса Выставкарттал центрданий.
