Культуралул сиптардал Пр­е­зидентнал фондрал кумаг­рацIух Аьрасатнаву гьашинугу най дур аьдатравун дагьсса «Филатов Фест» цIанилусса жагьил­сса шаэртурал фестиваль. Уттигъанну хьусса фестивальданул полуфиналданул жюрилувун увчIунни Да­гъусттаннал педагогикалул институтрал профессор Хизри Илиясов. Ва сий дусса фестивальданул жюрилувун жула дагъусттанчу, лаккучу увчIаву – му хъунмасса ишри.

ДакIнийн бутан, цIанихсса актер ва шаэр Леонид Филатовлул цIанийсса Щалагу Аьрасатнал жагьилсса шаэртурал фестивальданул гьану бивзссар 2014 шинал Таганкалийсса Театрданул актер Влад Маленкол сипталий. Гьашинусса фестиваль урчIилчинсса хъанай дур.
Фестивальданийнсса хIадур­шинна най дия шинал лажиндарай. Аьрзри кьамул буллай, 100 шаэрнал цIа дусса сияхIрава лайкьми язи бугьлай, четверть финаллу, полуфиналлу дуллай. Финал хьунтIиссар Арбатрай­сса Актернал Хъун къатлуву.